ជប៉ុន ផ្ដល់ឥណទាន ១៥៤លានដុល្លារ ដល់កម្ពុជា ដើម្បីអភិវឌ្ឍន៍មន្ទីរពេទ្យក្នុងតំបន់
ភ្នំពេញ៖ កម្ពុជានិងជប៉ុន បានចុះហត្ថលេខាលើលិខិតប្តូរសារ និងឯកសារពាក់ព័ន្ធ ស្តីពីការផ្ដល់ឥណទានសម្បទានប្រាក់យ៉េន ដែលមានទឹកប្រាក់ចំនួន ២១,១០៤ លានយ៉េន ស្មើនឹងប្រមាណ១៥៤លានដុល្លារអាម៉េរិក។ ទឹកប្រាក់នេះទុកប្រើប្រាស់ សម្រាប់អនុវត្ត«គម្រោងអភិវឌ្ឍន៍មន្ទីរពេទ្យក្នុងតំបន់»នៅទីស្តីការក្រសួងការបរទេស និងសហប្រតិបត្តិការអន្តរជាតិ។ នេះបើយោងតាម ស្ថានទូតជប៉ុនប្រចាំកម្ពុជាបញ្ជាក់ នៅព្រឹកថ្ងៃទី១៤ ខែមីនា ឆ្នាំ២០២៤។
កាលពីថ្ងៃទី១៣ មីនា ឯកឧត្តម KOMURA Masahiro អនុរដ្ឋមន្ត្រីក្រសួងការបរទេសជប៉ុន បានជួបពិភាក្សាការងារជាមួយ ឯកឧត្តម សុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ។ ក្នុងជំនួបនោះជប៉ុនបានបង្ហាញពីបំណងសហការជាមួយកម្ពុជា ក្នុងការដោះស្រាយបញ្ហាប្រឈមរួមរបស់សហគមន៍អន្តរជាតិដើម្បីរក្សា និងពង្រឹងសណ្តាប់ធ្នាប់អន្តរជាតិប្រកបដោយភាពសេរី។ ជាមួយគ្នានោះរដ្ឋមន្ត្រីក្រសួងការបរទេសកម្ពុជា បានថ្លែងអំណរគុណចំពោះការគាំទ្ររបស់ប្រទេសជប៉ុនទៅលើសន្តិភាព ការកសាងឡើងវិញ និងការអភិវឌ្ឍរបស់ប្រទេសកម្ពុជា។
ក្នុងនោះផងដែរឯកឧត្តមមានបំណងចង់ធ្វើការជាមួយប្រទេសជប៉ុនលើវិស័យកសាងសន្តិភាព និងសកម្មភាពកម្ចាត់មីនដើម្បីសន្តិភាព និងស្ថិរភាពនៃសហគមន៍អន្តរជាតិ។ ទន្ទឹមនឹងនោះភាគីទាំងពីរ បានចុះហត្ថលេខាលើលិខិតផ្លាស់ប្ដូរសារស្ដីពីការផ្ដល់ឥណទានសម្បទានប្រាក់យ៉េនសម្រាប់ «គម្រោងអភិវឌ្ឍន៍មន្ទីរពេទ្យក្នុងតំបន់» ផងដែរ។
សូមជម្រាបថា ការផ្ដល់ឥណទានសម្បទាននេះបញ្ជាក់ពីការប្តេជ្ញាចិត្តឥតងាករេរបស់ជប៉ុនក្នុងការគាំទ្រដល់កិច្ច ខិតខំប្រឹងប្រែងរបស់រាជរដ្ឋាភិបាលកម្ពុជា ចំពោះការជំរុញការអភិវឌ្ឍសង្គម-សេដ្ឋកិច្ច។ ការគាំទ្រនេះនឹងរួមចំណែកផងដែរដល់ការពង្រឹងទំនាក់ទំនងយូរអង្វែង និងកិច្ចសហប្រតិបត្តិការដ៏ជិតស្និទ្ធរវាងប្រទេសទាំងពីរដែលនៅក្នុងឆ្នាំ២០២៣ត្រូវបានដំឡើងកម្រិតទៅជា «ភាពជាដៃគូយុទ្ធសាស្ត្រគ្រប់ជ្រុងជ្រោយ»៕
