សិក្ខាកាមយោធាកម្ពុជា ចំណុះយោធភូមិភាគទី៤និងទី៥ ចូលរួមវគ្គបណ្តុះបណ្តាលហ្វឹកហាត់ការងារ ជួយសង្គ្រោះគ្រោះមហន្តរាយ ជាមួយកងទ័ពថៃ នៅខេត្តឆាក់ឆឺងសៅ
ភ្នំពេញ៖ ឧត្តមសេនីយ៍ត្រី សឹង្ហ ទុំ មេបញ្ជាការ កងពលតូចថ្មើរជើងលេខ៥១ នាថ្ងៃទី១៤ ខែមីនា ឆ្នាំ២០២៤ បានអញ្ជើញដឹកនាំសិក្ខាកាម យោធាកម្ពុជា ដែលមានសមាសភាពមកពីអង្គភាពយោធភូមិភាគទី៤ និងយោធភូមិភាគទី៥ សរុបចំនួន១០រូប ចូលរួមវគ្គបណ្តុះបណ្តាលជួយសង្គ្រោះគ្រោះមហន្តរាយ នៅមជ្ឈមណ្ឌលសង្គ្រោះគ្រោះមហន្តរាយ ខេត្តឆាក់ឆឺងសៅ ព្រះរាជាណាចក្រថៃ។
វគ្គបណ្តុះបណ្តាលនេះចាប់ពីថ្ងៃទី១០-១៥ ខែមីនា ឆ្នាំ២០២៤ ក្នុងគោលបំណងផ្តល់នូវបទពិសោធន៍ បច្ចេកទេស លក្ខណៈស្តង់ដា និងបែបវិទ្យាសាស្រ្ត រួមជាមួយនិងការរិតចំណងសម្ព័ន្ធមេត្រីភាព សាមគ្គីភាព រវាងកងទ័ពភូមិន្ទថៃ និងកម្ពុជា ពង្រឹងសមត្ថភាព ការងារជួយសង្គ្រោះគ្រោះមហន្តរាយ សម្រាប់ប្រជាជន នៃប្រទេសទាំងពីតាមបន្ទាត់ព្រំដែន ។
ក្នុងឱកាសនោះដែរ ឧត្តមសេនីយ៍ត្រី សឹង្ហ ទុំ បានមានប្រសាសន៍បញ្ជាក់ថា ដោយបានការអនុញាតិ ពីឯកឧត្តម នាយឧត្តមសេនីយ៍ ម៉ៅ សុផាន់ អគ្គមេបញ្ជាការរង មេបញ្ជាការកងទ័ពជើងគោក និងមេបញ្ជាការ យោធភូមិភាគទី៥ ឲ្យសក្ខាកាមកម្ពុជាមកហ្វឹកហាត់បណ្តុះបណ្តាល ការងារជួយសង្គ្រោះគ្រោះមហន្តរាយនេះ គឺបានផ្តល់នូវបទពិសោធន៍ថ្មីៗ បច្ចេកទេស ស្តង់ដា និងបែបវិទ្យាសាស្រ្ត ដើម្បីជាគុណប្រយោជន៍ក្នុងការជួយសង្គ្រោះអាយុជីវិតមនុស្ស ឲ្យបានលឿនរហ័ស ទាន់ពេលវេលា និងសុវត្ថិភាព៕
