ប្រមុខរាជរដ្ឋាភិបាល៖ ការដាក់ចេញកម្មវិធីគោលនយោបាយអាទិភាពចំនួន៦ គឺដើម្បីឆ្លើយតមតម្រូវការរបស់ប្រជាជន សង្គមជាតិ និងសេដ្ឋកិច្ច
ភ្នំពេញ៖ ក្នុងឱកាសអញ្ជើញដឹកនាំកិច្ចប្រជុំពេញអង្គគណៈរដ្ឋមន្រ្តី នាថ្ងៃទី១៥ ខែមីនា ឆ្នាំ២០២៤នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគូសបញ្ជាក់ថា ក្នុងរយៈពេល៦ខែដំបូង រាជរដ្ឋាភិបាល បានដាក់ចេញនូវកម្មវិធីគោលនយោបាយអាទិភាពចំនួន៦ សម្រាប់ចាប់ផ្តើមអនុវត្តភ្លាមៗនៅក្នុងឆ្នាំ២០២៣ ដើម្បីឆ្លើយតមទៅនឹងសេចក្តីតម្រូវការចាំបាច់ប្រចាំថ្ងៃរបស់ប្រជាជន សង្គមជាតិ និងសេដ្ឋកិច្ច។
សម្តេចធិបតីមានប្រសាសន៍ថា រាជរដ្ឋាភិបាល ក៏សម្រេចបាននូវការពង្រីកនូវរបបសន្តិសុខសង្គម និងមូលនិធិសមធម៌សុខាភិបាល ដែលការងារនេះ រាជរដ្ឋាភិបាល បានធ្វើបន្តពីអាណត្តិមុនៗ
សម្តេចធិបតី គូសបញ្ជាក់ថា ជាលទ្ធផល ក្នុងរយៈ៦ខែដំបូង របបសន្តិសុខសង្គម និងមូលនិធិសមធម៌សុខាភិបាល បានគ្របដណ្តប់ប្រជាពលរដ្ឋ៦.៨លាននាក់ ដែលក្នុងនោះមានសមាជិក ប.ស.ស. ទាំងរបបកាតាព្វកិច្ច និងរបបស្ម័គ្រចិត្តសរុបជាង២លាន ១សែននាក់៕
