គណៈប្រតិភូគណៈកម្មការសុខាភិបាល ចុះពង្រឹងសេវាពិនិត្យសុខភាពនៅមណ្ឌលសុខភាពអន្លង់ជ្រៃ

ភ្នំពេញ៖ គណៈប្រតិភូគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃរដ្ឋសភា (គណៈកម្មការទី៨ ) ដឹកនាំដោយ លោកជំទាវ ឡោក ខេង ប្រធានគណៈកម្មការ បានអញ្ជើញចុះពិនិត្យ ស្វែងយល់ពីស្ថានភាពការងារនៅមណ្ឌលសុខភាពអន្លង់ជ្រៃ ក្នុងស្រុកថ្ពង ខេត្តកំពង់ស្ពឺ នាថ្ងៃទី១៥ ខែមីនា ឆ្នាំ២០២៤។

ក្នុងឱកាសនោះដែរ លោក ថន ពេជ្រ ប្រធានមណ្ឌលសុខភាព បានជម្រាបជូនគណៈប្រតិភូពីវឌ្ឍនភាពការងារ ដែលមណ្ឌលសុខភាពបានធ្វើនាពេលកន្លងមក ពិសេសលើការផ្សព្វផ្សាយ និងការប្រើប្រាស់ប័ណ្ណ ប.ស.ស និងប័ណ្ណមូលនិធិសមធម៌ ជូនប្រជាពលរដ្ឋឱ្យបានត្រឹមត្រូវ និងយល់ច្បាស់ពីការប្រើប្រាស់ប័ណ្ណទាំងអស់នោះ ។ នាពេលថ្មីៗនេះ​ មណ្ឌលសុខភាពមានមន្ត្រី ចំនួន៨រូប សម្រាប់បម្រើសេវាជូនប្រជាពលរដ្ឋ ដែលបានមកទទួលសេវាពិនិត្យផ្ទៃពោះ សុខភាព និងព្យាបាលជំងឺផ្សេងៗ ដោយប្រើប្រាស់ប័ណ្ណ ប.ស.ស និងមូលនិធិសមធម៌ផងដែរ។ លោក ថន ពេជ្រ ប្រធានមណ្ឌលសុខភាពបានជម្រាបជូនលោកជំទាវប្រធានគណៈប្រតិភូគណៈកម្មការនូវបញ្ហាលំបាកមួយចំនួន ដែលបានជួបប្រទះនាពេលកន្លងមកជាពិសេសលើផ្នែកបច្ចេកទេសបរិក្ខារពេទ្យ និងសមត្ថភាពរបស់គ្រូពេទ្យក្នុងការផ្តល់សេវាដល់អ្នកជំងឺនៅមានកម្រិត។

ក្នុងឱកាសនោះដែរ ប្រធានមណ្ឌលសុខភាព បានស្នើសុំឱ្យគណៈប្រតិភូគណៈកម្មការទី៨ នៃរដ្ឋសភា​ ជួយជំរុញឱ្យរាជរដ្ឋាភិបាល ក៏ដូចជាក្រសួងសុខាភិបាលជួយសម្រួលឱ្យមណ្ឌលសុខភាពអន្លង់ជ្រៃ ទៅជាមន្ទីរពេទ្យបង្អែកស្រុកថ្ពងកម្រិត CPA1 និងពន្លឿនការផ្តល់នូវវ៉ាក់សាំងការពារជំងីផ្សេងៗ និងបរិក្ខារពេទ្យ ព្រមទាំងមន្ត្រីពេទ្យបន្ថែមទៀត សម្រាប់បម្រើសេវាពិនិត្យសុខភាពជូនប្រជាពលរដ្ឋឱ្យបានឆាប់រហ័ស។

ទន្ទឹមនឹងនោះដែរ លោកជំទាវ ឡោក ខេង បានមានប្រសាសន៍ថ្លែងអំណរគុណ និងកោតសរសើរដល់មន្ត្រីពេទ្យក្នុងមណ្ឌលសុខភាព ដែលខិតខំបម្រើសេវាសុខភាពជូនប្រជាពលរដ្ឋឱ្យទាន់ពេលវេលា និងជួយផ្សព្វផ្សាយពីផលលំបាកនៃជំងឺមិនឆ្លង ជូនដល់ប្រជាពលរដ្ឋឱ្យបានយល់ដឹងកាន់តែច្បាស់ ដើម្បីចូលរួមក្នុងការកាត់បន្ថយភាពក្រីក្រ ព្រមទាំងដាក់ប៉ាណូផ្សព្វផ្សាយពីជំងឺមិនឆ្លងតាមមណ្ឌលសុខភាពផងដែរ។

លោកជំទាវ បានជំរុញឱ្យមន្ត្រីពេទ្យទាំងអស់ ត្រូវតែពង្រឹងសមត្ថភាពរបស់ខ្លួនបន្ថែមទៀត
និងទទួលយកសំណើទាំងអស់របស់មណ្ឌលសុខភាពយកទៅពិភាក្សាជាមួយក្រសួង និងជំរុញ​ ក៏ដូចជាពន្លឿនការដោះស្រាយជូនមណ្ឌលសុខភាពឱ្យបានឆាប់រហ័ស ៕