ឯកឧត្តម ឈុន ពុទ្ធារិទ្ធ ដឹកនាំមន្ត្រីបច្ចេកទេសក្រសួងចុះពិនិត្យវឌ្ឍនាភាពការងារសាងសង់គម្រោងការពារច្រាំងទន្លេបាសាក់ ក្នុងភូមិសាស្ត្រខេត្តកណ្តាល

ភ្នំពេញ៖ នៅព្រឹកថ្ងៃសុក្រ ៦កើត ខែផល្គុន ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី១៥ ខែមីនា ឆ្នាំ២០២៤ ឯកឧត្តម ឈុន ពុទ្ធារិទ្ធ អគ្គនាយកនៃអគ្គនាយកដ្ឋានកិច្ចការបច្ចេកទេសនៃក្រសួងធនធានទឹក និងឧតុនិយម អមដំណើរដោយលោក ហ៊ុន សុទ្ធី អនុប្រធាននាយកដ្ឋានជលសាស្ត្រ និងការងារទន្លេ និងមន្ត្រីបច្ចេកទេស បានចុះពិនិត្យវឌ្ឍនភាពនៃគម្រោងសាងសង់សំណង់ការពារច្រាំងទន្លេបាសាក់ប្រវែង ១២០០ម៉ែត្រ ស្ថិតក្នុងភូមិសាស្ត្រសង្កាត់ព្រែកជ្រៃ ក្រុងសំពៅពូន ខេត្តកណ្តាល។

សូមជម្រាបថា ការអនុវត្តការងារសាងសង់សំណង់ច្រាំងទន្លេបាសាក់សម្រេចបានដូចខាងក្រោម៖
-ការងាររៀបបាវការពារចរន្តទឹកបុកហូរច្រោះដីផ្នែកខាងក្រោមសម្រេចបាន១០០%
-ការងារបុកស្បាន់ផាយ (Spun Pile) សម្រេចបាន១០០%
-ការងារបុកស៊ីផាយសម្រេចបាន ៩០%
-ការងារបេតុងអារមេសម្រេចបាន ៣០%
-ការងារបំពេញដីសម្រេចបាន ២៥%។

ឯកឧត្តមអគ្គនាយកបានបញ្ជាក់ថា គិតមកដល់ពេលនេះ វឌ្ឍនភាពនៃការងារសាងសង់សំណង់ច្រាំងទន្លេបាសាក់ក្នុងសង្កាត់ព្រែកជ្រៃ ក្រុងសំពៅពូន ខេត្តកណ្តាល សម្រេចបានប្រមាណ ៧២% បើតាមគម្រោង ការងារនេះនឹងបញ្ចប់ក្នុងដំណាច់ខែសីហា ឆ្នាំ២០២៤ ខាងមុខនេះ។

ក្នុងឱកាសនោះដែរ ឯកឧត្តមអគ្គនាយកបានណែនាំដល់ក្រុមការងារបច្ចេកទេសនៃនាយកដ្ឋានជលសាស្រ្ត និងការងារទន្លេឱ្យបន្តយកចិត្តទុកដាក់ពង្រឹងផ្នែកបច្ចេកទេស និងខិតខំពន្លឿនអនុវត្តការងារឱ្យសម្រេចបានតាមផែនការប្រកបដោយគុណភាព និងបានណែនាំបន្ថែមឱ្យក្រុមការងារបន្តពិនិត្យលទ្ធភាព និងសិក្សា លើកគម្រោងសម្រាប់ទីតាំងច្រាំងទន្លេបាសាក់ផ្នែកខាងក្រោមដែលត្រូវអនុវត្តបន្តទៀត ដើម្បីឆ្លើយតបតាមផែនការកាត់បន្ថយការបាក់ច្រាំងទន្លេឱ្យបានជាអតិបរមា ៕