វគ្គវិក្រិតការស្ដីពី “ការផ្ដល់សេវាសាធារណៈ របស់ក្រសួងការងារ និងបណ្ដុះបណ្ដាលវិជ្ជាជីវៈ”

ភ្នំពេញ៖ បន្ទាប់ពីបញ្ចប់វគ្គទី១ដោយជោគជ័យ នារសៀលថ្ងៃចន្ទ ទី១៨ ខែមីនា ឆ្នាំ២០២៤ នៅសាលប្រជុំនាយកដ្ឋានសេវាអតិថិជន និងទំនាក់ទំនងសាធារណៈ នៃទីស្នាក់ការកណ្ដាល ប.ស.ស. ក្រុមការងារឆ្លើយតប និងផ្តល់ព័ត៌មានពាក់ព័ន្ធនឹងសេវាសាធារណៈ របស់ក្រសួងការងារនិងបណ្ដុះបណ្ដាលវិជ្ជាជីវៈ បានរៀបចំវគ្គវិក្រិតការស្ដីពី “ការផ្ដល់សេវាសាធារណៈ របស់ក្រសួងការងារនិងបណ្ដុះបណ្ដាលវិជ្ជាជីវៈ” សម្រាប់ក្រុមទី២ ក្រោមអធិបតីភាព ឯកឧត្តម កត្តា អ៊ន រដ្ឋលេខាធិការ និងជាប្រធានក្រុមការងារឆ្លើយតប និងផ្ដល់ព័ត៌មានពាក់ព័ន្ធនឹងសេវាសាធារណៈ ដោយមានវាគ្មិន និងសិក្ខាកាមចូលរួមប្រមាណជា៣០រូប។

វគ្គវិក្រិតការនេះដែរ ធ្វើឡើងចាប់ពីថ្ងៃទី១៨ ដល់ថ្ងៃទី២២ ខែមីនា ឆ្នាំ២០២៤ ក្នុងគោលបំណងដើម្បីពង្រឹងសមត្ថភាព និងចំណេះដឹងមន្ត្រី បុគ្គលិកផ្នែកផ្តល់សេវាសាធារណៈ ក្នុងការផ្តល់សេវាសាធារណៈជូនប្រជាពលរដ្ឋឱ្យបានរហ័ស ច្បាស់លាស់ និងពេញចិត្តពីសាធារណជន។

ឯកឧត្តម កត្តា អ៊ន បានជំរុញដល់សិក្ខាកាមទាំងអស់ត្រូវយកចិត្តទុកដាក់រៀនសូត្រ លើកជាសំណួរ និងពិភាក្សាឱ្យបានផុលផុស ដើម្បីឱ្យកម្មវិធីនេះប្រព្រឹត្តទៅដោយផ្លែផ្កា និងទទួលបានជោគជ័យ៕