ប្រមុខរាជរដ្ឋាភិបាល៖ កូវីដ-១៩ បង្ហាញឱ្យឃើញពីសមត្ថភាព ជាក់ស្ដែងរបស់គ្រូពេទ្យ និងមន្ត្រីសុខាភិបាលរបស់កម្ពុជា
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានលើកឡើងថា វិបត្តិកូវីដ-១៩ បានបង្ហាញឱ្យយើងឃើញ អំពីសមត្ថភាពជាក់ស្ដែងរបស់គ្រូពេទ្យ និងមន្ត្រីសុខាភិបាលរបស់កម្ពុជា នៅទូទាំងប្រទេស ។
នាឱកាសអញ្ជើញបិទសន្និបាតសុខាភិបាល លើកទី៤៣ ឆ្នាំ២០២៣ និងលើកទិសដៅការងារ ឆ្នាំ២០២៤ នាថ្ងៃទី១៩ មីនា សម្ដេចធិបតី ហ៊ុន ម៉ាណែត បញ្ជាក់ថា «វិបត្តិកូវីដ-១៩ បានផ្ដល់ឱ្យយើងវាយតម្លៃបានទិដ្ឋភាពចំនួនពីរ ក្នុងវិស័យសុខាភិបាល ក្នុងដំណាក់កាលនៃការរីករាលដាលជំងឺកូវីដ-១៩ បានបង្ហាញឱ្យឃើញអំពីសមត្ថភាពជាក់ស្ដែងរបស់គ្រូពេទ្យ និងមន្ត្រីសុខាភិបាលរបស់កម្ពុជា នៅទូទាំងប្រទេស»។
សម្ដេចធិបតី បន្ដថា កូវីដ-១៩ ក៏បានបង្ហាញនូវកម្រិត និងបញ្ហាកង្វះខាតមួយចំនួន ដែលយើងបានប្រឈមពាក់ព័ន្ធ នឹងវិស័យសុខាភិបាលនេះ ជាពិសេសពាក់ព័ន្ធទៅនឹងការកសាងធនធានមនុស្ស ។
សម្ដេចធិបតីគូសបញ្ជាក់ថា វិបត្តិជំងឺកូវីដ-១៩ ឱ្យឃើញចំណុច២ ទាំងចំណុចខ្លាំង ប៉ុន្តែពេលជាមួយគ្នាក៏ឃើញនូវចំណុចខ្វះខាត ដែលដាក់ទិសដៅនៅក្នុងការពង្រឹងនៅក្នុងអាណត្តិទី ៧នេះ។ វិធានគន្លឹះមួយក្នុងរាជរដ្ឋាភិបាល អាណត្តិទី ៧នេះ គឺការពង្រឹងវិស័យសុខាភិបាល ដោយផ្អែកទៅលើមូលដ្ឋានសំខាន់ៗមួយចំនួន ៕
