អភិបាលខេត្តស្ទឹងត្រែង ជំរុញឲ្យអាជ្ញាធរពាក់ព័ន្ធ តាមដានក្រុមបណ្តាញសង្គមសារព័ត៌មានមួយចំនួន ដើរគាបសង្កត់ពលរដ្ឋ ដើម្បីរកប្រយោជន៍ផ្ទាល់ខ្លួន

ភ្នំពេញ៖ ក្នុងឱកាសដឹកនាំកិច្ចប្រជុំគណៈបញ្ជាការឯកភាពរដ្ឋបាលខេត្តស្ទឹងត្រែង នាថ្ងៃទី២០ មីនានេះ ឯកឧត្ដម ស្វាយ សំអ៊ាង អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តស្ទឹងត្រែង បានជំរុញឲ្យកងកម្លាំងទាំងអស់ ត្រូវតាមដាន និងក្ដាប់ឲ្យបានចំពោះក្រុមបណ្តាញសង្គមសារព័ត៌មានមួយចំនួន ដែលមកដើររកផលប្រយោជន៍លាភសការៈ ហើយទៅគាបសង្កត់ប្រជាពលរដ្ឋ ។

ពាក់ព័ន្ធទៅនឹងបញ្ហាបណ្ដាញសង្គម ដែលបានចុះផ្សាយព័ត៌មានមិនពិត ឯកឧត្តម ស្វាយ សំអ៊ាង បានណែនាំឲ្យជំនាញ ធ្វើការគ្រប់គ្រងយ៉ាងណាក៏ដោយ ឲ្យបានច្បាស់លាស់។

ឯកឧត្តមអភិបាលខេត្ត បានគូសបញ្ជាក់ថា ក្នុងរយៈពេល២ខែមកនេះ ក៏សារព័ត៌មានអន្តរជាតិមកសង្កេតការណ៍ក្នុងខេត្តរបស់យើង ហើយឯកឧត្តមថា នឹងចាត់វិធានការ ព្រោះមិនឲ្យអ្នកឯងមកដើរលុកលុយផ្តេសផ្តាសនោះទេ បើមិនចឹងវាអាចបង្កអាណាធិបតេយ្យ ដែលធ្វើឲ្យប៉ះពាល់ដល់សន្តិសុខសណ្តាប់ធ្នាប់ ទាំងក្នុងខេត្ត និងប្រទេសជាតិទាំងមូល។

ឯកឧត្តមអភិបាលខេត្ត ក៏ជំរុញកងកម្លាំងទាំងអស់ត្រូវតាមដានក្រុមបណ្តាញសង្គមសារព័ត៌មានមួយចំនួន ដែលមកដើររកផលប្រយោជន៍លាភប្រការ ហើយទៅគាបសង្កត់ពីប្រជាពលរដ្ឋ ត្រូវក្តាបឲ្យបានម៉ឺងម៉ាត់ ៕