សម្តេចធិបតី៖ ជីវភាពរស់នៅរបស់ពលរដ្ឋតាមជនបទ ជាគន្លឹះធានាបានចេរភាព និងភាពធន់នៃការអភិវឌ្ឍន៍សេដ្ឋកិច្ចសង្គម

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានថ្លែងថា ជីវភាពរស់នៅរបស់ប្រជាពលរដ្ឋនៅតាមតំបន់ជនបទ ជាគន្លឹះសម្រាប់ធានាឲ្យបាននូវចេរភាព និងភាពធន់នៃការអភិវឌ្ឍន៍នៃសេដ្ឋកិច្ចសង្គម។

ក្នុងឱកាសអញ្ជើញបិទសន្និបាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤ ក្រសួងអភិវឌ្ឍន៍ជនបទ នាថ្ងៃទី២០ ខែមីនា ឆ្នាំ២០២៤នេះ សម្តេចធិបតី ហ៊ុន ម៉ាណែត បានមានប្រសាសន៍ថា រាជរដ្ឋាភិបាលអាណាត្តិទី៧នេះ បានដាក់ចេញនូវយុទ្ធសាស្ត្របញ្ចកោណ ដែលមានគោលដៅជាយុទ្ធសាស្ត្រ៥៖ កំណើនសេដ្ឋកិច្ច បង្កើតការងារឲ្យកាន់តែច្រើន កាត់បន្ថយភាពក្រីក្រ បង្កើនប្រសិទ្ធិភាពស្ថាប័ន និងធានាចេរភាពនៃការអភិវឌ្ឍន៍សង្គម និងសេដ្ឋកិច្ច ដោយយកចិត្តទុកដាក់ខ្លាំងនៅក្នុងការពង្រឹងការអភិវឌ្ឍន៍ក្នុងកម្រិតមូលដ្ឋាន ជាពិសេសនៅតាមតំបន់ជនបទ ដែលជាគោល។

សម្តេចធិបតី បន្ថែមថា កិច្ចការទាំងអស់នេះត្រូវអនុវត្តតាមអភិក្រម ពង្រឹកមូលដ្ឋានរឹងមាំ ដើម្បីការអភិវឌ្ឍន៍ប្រទេសជាតិ បានយូរអង្វែង។

សម្តេចធិបតី បន្ថែមទៀតថា រាជរដ្ឋាភិបាលអាណាត្តិទី៧ ក៏បានដាក់វិធានការគន្លឹះនៅក្នុងការពង្រឹងមូលដ្ឋាន ដែលមានគ្រប់វិស័យដូចជា វិស័យអប់រំ វិស័យសុខាភិបាល និងការរក្សាឲ្យបាននូវសណ្តាប់ធ្នាប់សង្គម សន្តិសុខ នៅតាមភូមិឃុំ សង្កាត់ ស្រុក ក្រុង ជូនប្រជាពលរដ្ឋផងដែរ៕