ស្ថានទូតជប៉ុន ផ្ដល់ជំនួយឥតសំណងគម្រោងទ្រង់ទ្រាយតូចសម្រាប់ការផ្ដល់ឧបករណ៍តន្រ្តីបុរាណ ដល់សាលាមធ្យមវិចិត្រសិល្បៈ
ភ្នំពេញ៖ ស្ថានទូតជប៉ុនបានរៀបចំផ្ដល់ជំនួយឥតសំណងសម្រាប់គម្រោងទ្រង់ទ្រាយតូច សម្រាប់ការផ្ដល់ឧបករណ៍តន្រ្តីបុរាណ ដល់សាលាមធ្យមវិចិត្រសិល្បៈ ក្រោមវត្តមាន ឯកឧត្តម អ៊ូអិណុ អាត់ស៊ូស៊ី ឯកអគ្គរាជទូតវិសាមញ្ញ និង ពេញសមត្ថភាពរបស់ប្រទេសជប៉ុនប្រចាំព្រះរាជាណាចក្រកម្ពុជា និងលោក កំសាន្ត ហេង នាយកសាលា នៃសាលាមធ្យមវិចិត្រសិល្បៈ ដែលប្រារព្ធធ្វើនៅ ស្ថានទូតជប៉ុនប្រចាំកម្ពុជា។
ឯកឧត្តម អ៊ូអិណុ អាត់ស៊ូស៊ី ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំព្រះរាជាណាចក្រកម្ពុជា បានមានប្រសាសន៍ថា សម្រាប់គម្រោងដែលយើងចុះហត្ថលេខានាថ្ងៃនេះ រដ្ឋាភិបាលជប៉ុនផ្តល់ថវិកាចំនួន ៣៨,៧៥០ ដុល្លារ អាមេរិក (សាមសិបប្រាំបីពាន់ប្រាំពីររយហាសិបដុល្លារអាមេរិក) ទៅដល់សាលាមធ្យមវិចិត្រសិល្បៈ ក្នុងគោលបំណងតម្លើងឧបករណ៍តន្ត្រីបុរាណខ្មែរចំនួន ១៥ប្រភេទ សរុប ២៤គ្រឿង។
ឯកឧត្ដមបានបន្តថា ដោយសារកង្វះខាត ឧបករណ៍តន្ត្រីបុរាណ សាលាមធ្យមវិចិត្រសិល្បៈ បាននឹងកំពុងប្រឈមមុខនឹងបញ្ហាក្នុងការបណ្តុះបណ្តាល យុវវ័យជំនាន់ថ្មី ដែលអាចលេងឧបករណ៍តន្ត្រីបុរាណទាំងនេះបាន។ ជាមួយការតម្លើងឧបករណ៍ថ្មី យើងរំពឹងថា លោកគ្រូអ្នកគ្រូ និងសិស្សានុសិស្ស នឹងមានឱកាសកាន់តែច្រើនក្នុងការសម្តែង និងហាត់សមឧបករណ៍តន្ត្រី បុរាណខ្មែរទាំងនោះ ហើយនឹងអាចពង្រីក ក៏ដូចជាបន្តវប្បធម៌ខ្មែរទៅថ្ងៃអនាគត។
ឯកឧត្តម អ៊ូអិណុ អាត់ស៊ូស៊ី បានបញ្ជាក់ថា ជប៉ុន និងកម្ពុជាមានទំនាក់ទំនងការទូតជិតស្និទ្ធិជាង ៧០ឆ្នាំមកហើយ។ ឯកឧត្តមសង្ឃឹមថា គម្រោងនេះនឹងជួយ សម្រួលដល់ការផ្លាស់ប្តូរវប្បធម៌ ក៏ដូចជាធ្វើឱ្យចំណងមិត្តភាព និងការយល់អំពីគ្នាមានភាពកាន់តែស៊ីជម្រៅរវាង ប្រទេសទាំងពីរ។ ជប៉ុន នឹងបន្តចូលរួមចំណែកក្នុងការដោះស្រាយបញ្ហាប្រឈម ដើម្បីកែលម្អគុណភាពជីវិត តាមរយៈគ្រោងការណ៍ជំនួយអភិវឌ្ឍន៍ផ្លូវការផ្សេងៗ ដែលរួមមាន ជំនួយឥតសំណងគូសាណូណិទាំងពីរទម្រង់ គឺ ជំនួយឥតសំណងសម្រាប់គម្រោងទ្រង់ទ្រាយតូចសន្តិសុខមនុស្សជាតិ និងជំនួយឥតសំណងសម្រាប់ គម្រោងទ្រង់ទ្រាយតូចវប្បធម៌៕
