ប្រមុខរាជរដ្ឋាភិបាល ប្រកាសឧបត្ថម្ភថវិកា ២០០លានរៀលក្នុង១ឆ្នាំ ដល់មូលនិធិជនពិការតេជោសែន
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានប្រកាសគាំទ្រ ការបង្កើតមូលនិធិជន ពិការតេជោសែន ដោយសម្តេចនឹងឧបត្ថម្ភថវិកា ២០០លានរៀលក្នុង១ឆ្នាំ រយៈពេល៤ឆ្នាំដំបូង សម្រាប់ទ្រទ្រង់ដំណើរការ មជ្ឈមណ្ឌលមួយនេះ។
ក្នុងឱកាសអញ្ជើញសម្ពោធសមិទ្ធផលមជ្ឈមណ្ឌលជាតិ នៃជនពិការតេជោសែន និងគណៈកម្មាធិការជាតិប៉ារ៉ាឡាំពិកកម្ពុជា នាព្រឹកថ្ងៃទី២១ ខែមីនា ឆ្នាំ២០២៤ តបតាមសំណើរ របស់ប្រធានមជ្ឈមណ្ឌលជាតិ នៃជនពិការតេជោសែន សម្តេចធិបតីបានឯកភាព និងគាំទ្រដល់ការបង្តើត មូលនិធិតេជោសែន ដើម្បីគៀងគរប្រភពថវិកា។ ទន្ទឹមនឹងការឯកភាពនៃការបង្កើតមូលនិធិនេះ សម្តេចធិបតី ហ៊ុន ម៉ាណែត ក៏បានជំរុញឲ្យរួមបញ្ជូលគ្នា រវាងមូលនិធិជនពិកាហ៊ុនសែន ដែលបង្កើតក្នុងឆ្នាំ១៩៩៧ មកនៅក្នុងមូលនិធិជន ពិការតេជោសែនតែមួយតែម្តងផងដែរ។
ជាមួយគ្នានេះ សម្តេចធិបតី នាយករដ្ឋមន្ត្រី ក៏បានណែនាំឲ្យរៀបចំលក្ខន្តិកៈ ឲ្យបានត្រឹមត្រូវ ដើម្បីធានាប្រសិទ្ធភាព ក្នុងការគ្រប់គ្រង ក៏ដូចជាការបង្កើតការទុកចិត្ត និងការចូលរួមដល់មូលនិធិនេះផងដែរ។
សម្តេចធិបតី នាយករដ្ឋមន្ត្រី បានមានប្រសាសន៍យ៉ាងដូច្នេះថា «នៅក្រោយពេលបង្កើតនេះ ខ្ញុំសូមបោះមេ ខ្ញុំសូមចូលរួម២០០លានរៀល តែម្តង នៅក្នុងមូលនិធិនេះ។ ហើយនឹងបន្ត១ឆ្នាំ ២០០លានរៀល នៅក្នុង៣ឆ្នាំទៅមុខទៀត សរុប៤ឆ្នាំដំបូល ក្នុង១ឆ្នាំ២០០លានរៀលតែម្តង»។
ឆ្លៀតក្នុងឱកាសនេះ សម្តេចធិបតី នាយករដ្ឋមន្ត្រី ក៏បានអំពាវនាវដល់សប្បុរសជន ទាំងជាតិនិងអន្តរជាតិបន្តជួយឧបត្ថម្ភដល់មជ្ឈមណ្ឌលជាតិ នៃជនពិការតេជោសែន ឲ្យដំណើរការទៅមុខបន្តទៀត។
សម្តេចធិបតី ហ៊ុន ម៉ាណែត ក៏បានប្រកាសទទួលយកសំណើ ពីប្រធានមជ្ឈមណ្ឌលជាតិ នៃជនពិការតេជោសែន ចំពោះការស្នើឲ្យសម្តេច ធ្វើជាប្រធានកិត្តិយស មជ្ឈមណ្ឌលជាតិ នៃជនពិការតេជោសែន ផងដែរ ៕
