សម្តេចធិបតី៖ កម្ពុជាពិតជាមានមោទនភាព ចំពោះប្រជាពលរដ្ឋ ដែលគោរពកាន់សាសនាផ្សេងៗគ្នា ប៉ុន្តែសាមគ្គីគ្នាយ៉ាងល្អប្រសើរ

ភ្នំពេញ៖ ក្នុងពិធីពិសារអាហារស្រាយបួសខែរ៉ាម៉ាឌន នាល្ងាចថ្ងៃទី២១ ខែមីនា ឆ្នាំ២០២៤នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានថ្លែងថា កម្ពុជាពិតជាមានមោទនភាពចំពោះប្រជាពលរដ្ឋ ដែលគោរពកាន់សាសនាផ្សេងៗគ្នា ប៉ុន្តែសាមគ្គីគ្នាយ៉ាងល្អប្រសើរ ។

សម្តេចធិបតី ហ៊ុន ម៉ាណែត មានប្រសាសន៍ថា នេះមិនត្រឹមតែជាមោទនភាពរបស់កម្ពុជានោះទេ តែជាមោទនភាពសម្រាប់ប្រទេសនៅក្នុងតំបន់ និងពិភពលោកផងដែរ ខណៈដែលប្រទេសជាច្រើនបានកោតសរសើរចំពោះសុខដុមរមនីកម្មសាសនានៅព្រះរាជាណាចក្រកម្ពុជា តាមរយៈគោលនិយោបាយដ៏ត្រឹមត្រូវរបស់រាជរដ្ឋាភិបាល ដែលមានកិច្ចសហការល្អជាមួយ ស្ថាប័ន អង្គភាព ក៏ដូចជាដៃគូពាក់ព័ន្ធ ដើម្បីធ្វើឲ្យមានប្រសិទ្ធិភាពខ្ពស់លើការងារ និងបង្កភាពងារស្រួលជូនប្រជាពលរដ្ឋគ្រប់សាសនិក នៅកម្ពុជា ទាំងបច្ចុប្បន្ន និងអនាគត។

សម្តេចធិបតី បន្ថែមថា រាជរដ្ឋាភិបាលនៅក្នុងបុព្វហេតុប្រទេសជាតិ និងប្រជាជន បានខិត្តខំធ្វើឲ្យសាសនាទាំងអស់ទទួលបានការគាំពារ និងការលើកទឹកចិត្តផ្នែកសុខដុមនីកម្មសាសនា ដើម្បីឆ្ពោះទៅរកការរីកចម្រើនដើម្បីរស់នៅក្នុងសន្តិភាព និងការអភិវឌ្ឍន៍។

សម្តេជធិបតីលើកឡើងថា រាជរដ្ឋាភិបាល តែងតែយកចិត្តទុកដាក់ផ្តល់សេរីភាពជំនឿសាសនាយ៉ាងទូលំទូលាយ ដល់ប្រជាជនទូទៅ ដោយឈរលើមូលដ្ឋាននៃការពង្រឹងសុខដុមនីកម្មសាសនិកនៃគ្រប់និកាយសាសនា ដោយប្រឆាំងរាល់ទង្វើររើសអើយ សំដៅទប់ស្កាត់ការយកសាសនាធ្វើអាជីវកម្ម ដែលអាចបង្កវិបត្តិសាសនានៅកម្ពុជា៕