ស័ង្កសី ដែលជាអំណោយដ៏ថ្លៃថ្លារបស់ សម្តេចធិបតី ហ៊ុន ម៉ាណែត និងលោកជំទាវ បានប្រគល់ជូន ទីបញ្ជាការ យោធភូមិភាគទី៥
ភ្នំពេញ៖ ឯកឧត្តម គីម ប៊ុនថាន រដ្ឋមន្ត្រីប្រតិភូអមនាយករដ្ឋមន្ត្រី តំណាងដ៏ខ្ពង់ខ្ពស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នៅថ្ងៃទី២២ ខែមីនា ឆ្នាំ២០២៤ បាននាំយកនូវសង្ក័សី ចំនួន ៥.០០០សន្លឹក ដែលជាអំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី សម្រាប់ចុះជួយប្រជាពលរដ្ឋ ដែលងាយរងគ្រោះដោយគ្រោះធម្មជាតិ និងមានជីវភាពលំបាកខ្វះខាត ក្នុងទិសយោធភូមិភាគទី៥។
ឧត្តមសេនីយ៍ទោ សេង ធារិន សូមគោរព និងថ្លែងអំណរគុណដ៏ជ្រាលជ្រៅជាទីបំផុតចំពោះ សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ដែលជានិច្ចជាកាល លោកតែងតែឧបត្ថម្ភ ស្បៀងអាហារ គ្រឿងឧបភោគបរិភោគ និងសម្ភារៈផ្សេងៗ ជាបន្តបន្ទាប់សម្រាប់ជួយដោះស្រាយនូវរាល់ការលំបាកខ្វះខាត
ឧត្តមសេនីយ៍ទោ សេង ធារិន បានប្ដេជ្ញាចិត្តបន្តសកម្មភាពនាំយកសង្ក័សី ទៅផ្ដល់ជូនដល់ក្រុមគ្រួសារកងទ័ព និងប្រជាជន ដែលមានជីវភាពលំបាកខ្វះខាតពិតប្រាកដ នៅតាមមូលដ្ឋាននានា និងសូមជូនពរសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី សូមទទួលបាននូវពុទ្ធពរទាំងប្រាំបួនប្រការគឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕
