ឯកឧត្តម អ៊ូច ភា អញ្ជើញចូលរួមក្នុងពិធីសម្ពោធដាក់ឱ្យប្រើប្រាស់ មហាកុដិ្ឋ និងសមិទ្ធផលនានាក្នុងវត្តសន្លុង មានតម្លៃជាង ៨០ម៉ឺនដុល្លារ ក្នុងស្រុកទ្រាំង

ភ្នំពេញ៖ នាព្រឹកថ្ងៃសុក្រ ទី២២ ខែមីនា ឆ្នាំ២០២៤ ឯកឧត្តម អ៊ូច ភា អភិបាលខេត្តតាកែវ បានអញ្ជើញចូលរួមក្នុងពិធីសម្ពោធដាក់ឱ្យប្រើប្រាស់នូវ មហាកុដិ្ឋ និងសមិទ្ធផលនានា ក្នុងវត្តសន្លុង ឃុំសន្លុង ស្រុកទ្រាំង ដែលចំណាយថវិកាសាងសង់អស់ជិត ៧៩៤,៧០០ដុល្លារ និងប្រាក់រៀល ៤៨,៩៨០,០០០រៀល ក្រោមអធិបតីភាពឯកឧត្តម បណ្ឌិត ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តតាកែវ។

ពិធីនេះក៏មានការ និមន្ត និងអញ្ជើញចូលរួម ដោយ ព្រះមហាវីរៈវង្សាចារ្យ ជ្រិន សិទ្ធិ ព្រះរាជាគណៈថ្នាក់ត្រី ព្រះរស្មីមរកត ព្រះមេគណគណៈធម្មយុត្តិកនិកាយខេត្ត និងជាព្រះចៅអធិការវត្តលំពូលសាមគ្យារាម ព្រះពោធិមុនី ឡូ នូវ ព្រះមេគណរងគណៈធម្មយុត្តិកនិកាយខេត្ត និងជាព្រះចៅអធិការវត្តសន្លុង ឯកឧត្តម លោកជំទាវ ប្រតិភូអមដំណើរ ឯកឧត្តម យស ណាស៊ី ប្រធានក្រុមប្រឹក្សាខេត្ត លោក លោកស្រី អភិបាលរងខេត្ត លោក លោកស្រី ប្រធាន អនុប្រធាន មន្ទីរអង្គភាពជុំវិញខេត្ត លោកមេបញ្ជាការតំបន់ប្រតិបត្តិការសឹករងខេត្ត លោកមេបញ្ជាការកងរាជអាវុធហត្ថខេត្ត លោកស្នងការរងនគរបាលខេត្ត លោក អភិបាលស្រុកស្ដីទី លោក លោកស្រី អភិបាលរងស្រុក មន្រ្តីរាជការចំណុះរដ្ឋបាលស្រុក ប្រជាពលរដ្ឋ និងសិស្សានុសិស្សជាច្រើនកុះករផងដែរ ៕