ឯកឧត្ដម តាន់ ហ្សង់ហ្វ្រង់ស័រ៖ ការនាំចូលថាមពលអគ្គិសនីពីឡាវ គឺធ្វើឲ្យអគ្គិសនីក្នុងស្រុកចុះថោក និងចំណេញបរិស្ថានធម្មជាតិ
ភ្នំពេញ៖ ឯកឧត្ដម ហ្សង់ ហ្វ្រង់ស័រ តាន់ រដ្ឋមន្រ្តីប្រតិភូអមនាយករដ្ឋមន្រ្តី បានថ្លែងថា ការនាំចូលថាមពលអគ្គិសនីពីប្រទេសឡាវ គឺដើម្បីគោលដៅ ១៖ នាំចូលអគ្គិសនីថោក ធ្វើឲ្យអគ្គិសនីក្នុងស្រុកចុះថោក និង២៖ ចំណេញបរិស្ថានធម្មជាតិ ដូចជាការមិនធ្វើវារីអគ្គិសនីបន្ថែម។
ឯកឧត្ដម ហ្សង់ហ្វ្រង់ស័រ តាន់ ថ្លែងបែបនេះ ក្នុងឱកាសធ្វើសន្និសីទសារព័ត៌មាន នារសៀលថ្ងៃទី២៦ ខែមីនា ឆ្នាំ២០២៤នេះខណៈពេលសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា អញ្ជើញត្រឡប់ពីទស្សនកិច្ចនៅប្រទេសឡាវ មកដល់រាជធានីភ្នំពេញ ប្រកបដោយសុវត្ថិភាព។
ឯកឧត្ដមរដ្ឋមន្ត្រីប្រតិភូអមនាយករដ្ឋមន្ត្រីបានបន្ថែមថា កម្ពុជានៅតែបន្តមានមហិច្ឆតានូវការក្តាប់ឲ្យបាននូវឯករាជ្យភាពផ្នែកថាមពល។ ជាក់ស្តែង ក្នុងគ្រាបច្ចុប្បន្ន កម្ពុជាតាមរយៈការផលិតដោយខ្លួនឯង ផ្គត់ផ្គង់បានប្រហែល ៧៥ភាគរយ នៃបរិមាណអគ្គិសនី ដែលប្រទេសត្រូវការ រីឯ ២៥ភាគរយទៀត ទិញពីឡាវ ពីវៀតណាម និងពីថៃ៕
