ឯកឧត្តមបណ្ឌិត កៅ គឹមហួន នឹងដឹកនាំគណៈប្រតិភូលេខាធិការដ្ឋានអាស៊ាន ចូលរួមសន្និសីទប្រចាំឆ្នាំនៃវេទិកាបូអាវ ឆ្នាំ២០២៤ នៅប្រទេសចិន
ភ្នំពេញ៖ តបតាមការអញ្ជើញរបស់ឯកឧត្តម លី ប៉ោទុង អគ្គលេខាធិការនៃវេទិកាបូអាវសម្រាប់អាស៊ី ឯកឧត្តមបណ្ឌិត កៅ គឹមហួន អគ្គលេខាធិការអាស៊ាន នឹងអញ្ជើញដឹកនាំគណៈប្រតិភូលេខាធិការដ្ឋានអាស៊ាន ទៅចូលរួមសន្និសីទប្រចាំឆ្នាំនៃវេទិកាបូអាវ ឆ្នាំ២០២៤ នៅខេត្តហៃណាន សាធារណរដ្ឋប្រជាមានិតចិន ចាប់ពីថ្ងៃទី២៧ ដល់២៩ ខែមីនា ឆ្នាំ២០២៤។
នៅក្នុងឱកាសនោះឯកឧត្តមអគ្គលេខាធិការអាស៊ាន នឹងអញ្ជើញផ្តល់សន្ទរកថា ស្តីពី «អាស៊ី៖ ការកសាងចំណុចស្នូលនៃកំណើន»។
ក្នុងអំឡុងពេលស្នាក់នៅប្រទេសចិន ឯកឧត្តមបណ្ឌិត កៅ គឹមហួន នឹងឆ្លៀតឱកាសដើម្បីជួបទ្វេភាគី និងផ្តល់កិច្ចសម្ភាសន៍មួយចំនួន ដើម្បីជំរុញការទូតសាធារណៈអាស៊ាន ក៏ដូចជាជំរុញឱ្យមើលឃើញអាស៊ានកាន់តែច្បាស់ ៕
