ឧត្តមសេនីយ៍ឯក ឆាយ គឹមខឿន៖ នគរបាលប៉ុស្តិ៍ គឺជាមូលដ្ឋានគ្រឹះនៃសន្តិសុខជាតិ
ភ្នំពេញ៖ ឯកឧត្តម ឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ បានមានប្រសាសន៍ថា នគរបាលប៉ុស្តិ៍ គឺជាមូលដ្ឋានគ្រឹះនៃសន្តិសុខជាតិ។
ការលើកឡើងរបស់ ឯកឧត្តម ឧត្តមសេនីយ៍ឯក ឆាយ គឹមខឿន តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងឯកឧត្តម ឌឹម បូរ៉ា អភិបាលរង ខេត្តកណ្តាល តំណាងដ៏ខ្ពង់ខ្ពស់ ឯកឧត្តម គង់ សោភ័ណ្ឌ អភិបាល នៃគណៈអភិបាលខេត្តកណ្តាល អញ្ជើញជាអធិបតីក្នុងពិធីបិទបូកសរុបលទ្ធផលការងារចុះតាមដានត្រួតពិនិត្យ និងគាំទ្រដើម្បីពង្រឹងប្រសិទ្ធភាពការងាររបស់ប៉ុស្តិនគរបាលរដ្ឋបាល នៅព្រឹកថ្ងៃពុធ ទី២៧ ខែមីនា ឆ្នាំ២០២៤ ដោយមានការអញ្ជើញចូលរួមពីសំណាក់ លោកឧត្តមសេនីយ៍ប្រធាន-អនុប្រធាននាយកដ្ឋានកិច្ចការប៉ុស្តិ៍នគរបាលរដ្ឋបាល លោកឧត្តមសេនីយ៍ទោស្នងការខេត្ត លោកស្នងការរង លោកអធិការ លោកនាយប៉ុស្តិ៍នគរបាលរដ្ឋបាល និងលោកអភិបាល-អភិបាលរងក្រុង ស្រុក ឃុំ ជាច្រើនរូបទៀត។
បន្ទាប់ពីបានស្តាប់របាយការណ៍របស់ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្ត និងរបាយការណ៍របស់លោកឧត្តមសេនីយ៍ទោ មាស លឹមតុង ប្រធាននាយកដ្ឋានកិច្ចការប៉ុស្តិ៍នគរបាលរដ្ឋបាល និងមតិណែនាំរបសឯកឧត្តម ឌឹម បូរ៉ា អភិបាលរងខេត្តកណ្តាល រួចមក ឯកឧត្តម ឧត្តមសេនីយ៍ឯក ឆាយ គឹមខឿន បានមានប្រសាសន៍បង្ហាញពីសេចក្តីសោមនស្សរីករាយ ដែលបានជួបគ្នាជាថ្មីម្តងទៀត ជាមួយកងកម្លាំងនគរបាលខេត្តកណ្តាល ពិសេសឯកឧត្តម ឌឹម បូរ៉ា អភិបាលរងខេត្តកណ្តាល និងសូមថ្លែងអំណរគុណចំពោះការយកចិត្តទុកដាក់របស់គណៈអភិបាលខេត្ត និងសូមថ្លែងអំណរគុណ ចំពោះតំណាងគណៈអភិបាលស្រុក រដ្ឋបាលឃុំ សង្កាត់ដែលមានវត្តមាននៅទីនេះ។
ឯកឧត្តម ឧត្តមសេនីយ៍ឯក អគ្គស្នងការរង បានបញ្ជាក់ថា តាមរយៈការអនុវត្តគោលនយោបាយ ភូមិ-ឃុំ-សង្កាត់មានសុវត្ថិភាព ស្របតាមកម្មវិធីនយោបាយ និងយុទ្ធសាស្ត្ររបស់រាជរដ្ឋាភិបាលកម្ពុជា ដែលអតីតសម្តេចតេជោ ហ៊ុន សែន ជាប្រមុខដឹកនាំ បានខិតខំប្រឹងប្រែងស្វែងរកបានឲ្យយើងទាំងអស់គ្នាថែរក្សាបាននូវសុខសន្តិភាពនេះ។ ដូច្នេះហើយដើម្បីឲ្យសុខសន្តិភាពនេះ នៅគង់វង្ស យូរអង្វែង រឹងមាំ យើងក៏ត្រូវមានការប្រឡងប្រណាំង និងអភិវឌ្ឍ ភូមិ-ឃុំ-សង្កាត់មានសុវត្ថិភាពផងដែរ។ តាមរយៈការអនុវត្តគោលនយោបាយ ភូមិ-ឃុំ-សង្កាត់មានសុវត្ថិភាព យើងឃើញថា កម្លាំងបង្អែកដែលជាចលករជំរុញចលនាក៏ជានគរបាលប៉ុស្តិ៍។ កាលណាប៉ុស្តិ៍រឹងមាំ បង្កើតបានជាគោលនយោបាយភូមិ-ឃុំ-សង្កាត់មានសុវត្ថិភាព គឺទាមទារសុវត្ថិភាព ទាមទារបរិមាណកម្លាំង និងទាមទារការបំពាក់ឲ្យនគរបាលប៉ុស្តិ៍ ដើម្បីជាជំនួយ ទើបបានបង្កើតជាកម្លាំងប្រជាការពារនេះឡើង ដែលជាកម្លាំងជំនួយដ៏សំខាន់ដល់កម្លាំងនគរបាលប៉ុស្តិ៍។
ឯកឧត្តម ឧត្តមសេនីយ៍ឯក អគ្គស្នងការរង បានបញ្ជាក់បន្ថែមថា យើងមានសន្តិភាពហើយ ប៉ុន្តែនៅមានបញ្ហាសន្តិសុខ សណ្តាប់ធ្នាប់សាធារណៈ បញ្ហាសុខមាលភាពរបស់ប្រជាពលរដ្ឋ និងការផ្តល់សេវាចាំបាច់នានាមួយចំនួន នៅតែជាបញ្ហាអាទិភាពដែលត្រូវយកចិត្តទុកដាក់ជាប្រចាំ ដើម្បីធានាឱ្យជនគ្រប់រូប និងសង្គមទាំងមូល មានសុវត្ថិភាពយ៉ាងល្អប្រសើរ ទើបក្រសួងមហាផ្ទៃ ដោយមានការគាំទ្រ និងចូលរួមពី ក្រសួង ស្ថាប័ន រដ្ឋបាលថ្នាក់ក្រោមជាតិ ក្រុមការងាររបស់រាជរដ្ឋាភិបាលចុះមូលដ្ឋាន និងអ្នកពាក់ព័ន្ធ បានចាត់តាំងអនុវត្តប្រកបដោយជោគជ័យ និងបានធ្វើការកែលម្អផែនការណែនាំស្តីពីការចាត់តាំងអនុវត្តគោល នយោបាយ «ភូមិ-ឃុំមានសុវត្ថិភាព» ជាបន្តបន្ទាប់ ឱ្យស្របតាមបរិបទនៃការអភិវឌ្ឍរីកចម្រើនរបស់សង្គមជាតិ។ ដូច្នេះហើយ ដើម្បីឆ្លើយតបទៅនឹងស្ថានភាពបច្ចុប្បន្ន រាជរដ្ឋាភិបាលសម្រេចកែលម្អលក្ខណ សម្បត្តិ នៃគោលនយោបាយ ភូមិ-ឃុំ-សង្កាត់មានសុវត្ថិភាព ព្រមទាំងលើកកម្រិតគោលនយោបាយនេះ ជារបស់រាជរដ្ឋាភិបាល ដែលមានគោលបំណង និងសំណូមពរ។
ឯកឧត្តម ឧត្តមសេនីយ៍ឯក អគ្គស្នងការរង បានបន្តថា តាមរយៈនយោបាយ ភូមិ-ឃុំ-សង្កាត់មានសុវត្ថិភាព ដើម្បីធានាបាននូវកិច្ចការសន្តិសុខ សណ្តាប់ធ្នាប់ សុវត្ថិភាព និងការផ្តល់សេវាសាធារណៈនានាប្រកបដោយប្រសិទ្ធភាពឆាប់រហ័ស មន្ត្រីនគរបាលប៉ុស្តិ៍ ត្រូវពង្រឹងការងារនគរបាលនិងសហគមន៍ គឺប្រកាន់ខ្ជាប់នូវឥរិយាបថ សីលធម៌ សេចក្តីថ្លៃថ្នូរ និងការប្រាស្រ័យទាក់ទងជាមួយប្រជាពលរដ្ឋ ដោយបំផុសឱ្យមានកិច្ចសហការចូលរួមជាមួយសមត្ថកិច្ច ពីវិស័យសាធារណៈ វិស័យឯកជន អ្នកពាក់ព័ន្ធនានា និងប្រជាពលរដ្ឋនៅទូទាំងប្រទេស ៕
