ក្រុមការងាររាជរដ្ឋាភិបាលចុះមូលដ្ឋានស្រុកស្នួល ចុះជួបជាមួយប្រជាពលរដ្ឋ អំពីបញ្ហាប្រឈមរបស់ពួគ ក្នុងអង្គវេទិកាសាធារណៈក្នុងឃុំស្នួល
ភ្នំពេញ៖ នាព្រឹកថ្ងៃសុក្រ ៥រោច ខែផល្គុន ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២៩ ខែមីនា ឆ្នាំ២០២៤ ឯកឧត្តម លី ផល្លា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះជួយស្រុកស្នួល និងឯកឧត្តម គង់ គឹមនី អភិបាលរងខេត្តក្រចេះ និងជាប្រធានក្រុមការងារខេត្តចុះមូលដ្ឋានស្រុកស្នួល បានអញ្ជើញជាអធិបតីក្នុងវេទិកាសាធារណៈដើម្បីត្រួតពិនិត្យ និងគាំទ្រការអនុវត្តកម្មវីធីនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា ស្ថិតនៅភូមិផ្សារស្នួល ឃុំស្នួល ស្រុកស្នួល ខេត្តក្រចេះ។
ក្នុងអង្គវេទិកានោះដែល មានប្រជាពលរដ្ឋស្នើសុំនិងបញ្ហាប្រឈមមួយចំនួនដូចជា៖
១)-សុំជួយដាក់លូ នៅផ្លូវកែងចូលផ្សារ ព្រោះវាមានបញ្ហាស្ទះ និងមានក្លិនស្អុយ ប៉ះពាល់ដល់ប្រជាពលរដ្ឋរស់នៅតំបន់នោះ
២)-បញ្ហាតបណ្តាញអគ្គិសនីចូលក្នុងភូមិត្រពាំងលាក់ចំការកៅស៊ូ ព្រោះគ្មានអគ្គិសនីប្រើប្រាស់ និងពិបាកដល់សិស្សានុសិស្សចេញចូលទៅសាលារៀន
៣)-ស្នើសុំជួសជុលផ្លូវចូលក្នុងភូមិត្រពាំងលាក់១ខ្សែ ព្រោះផ្លូវនេះបានខូចខាតធ្ងន់ធ្ងរពិបាកធ្វើដំណើរនិងដឹកជញ្ជូនកសិផល
៤)-ស្នើសុំជួសជុលសាលាបឋមសិក្សាកាត់ដៃ ព្រោះឥលូវនេះសាលាមានសភាពចាស់ទ្រុឌទ្រោមខ្លាំងណាស់ និងជួយស្តារប្រព័ន្ធធារាសាស្ត្រ ព្រោះវាស្ទះបង្ករទឹកជំនន់ប៉ះពាល់ដល់ដំណាំកសិកម្ម របស់កសិករ និងផ្ទះរបស់ប្រជាពលរដ្ឋនៅតំបន់នោះ។
ក្រោយពីបានស្តាប់នូវការលើកឡើងស្នើសុំរបស់ប្រជាពលរដ្ឋ ឃើញថាបណ្តាមន្ទីរពាក់ពន្ធ័បានបកស្រាយពន្យល់ជូនភ្លាមៗ និងមួយចំនួនទៀតទុកដោះស្រាយនិងយកទៅសិក្សាបន្ត ហើយបងប្អូនប្រជាពលរដ្ឋ ពួកគាត់ក៏បានស្ដាប់និងទទួលយក ដោយការសប្បាយចិត្ត។
ក្នុងនោះដែល ឯកឧត្តម គង់ គឹមនី អភិបាលរងខេត្ត បានដំណោះស្រាយសំណូមពរ ករណីភ្លើងឆេះផ្ទះប្រជាពលរដ្ឋមួយគ្រួសារ នៅភូមិស្នួលលិច ឃុំស្នួល លោកចុះពិនិត្យផ្ទាល់ ដើម្បីសាងសង់ផ្ទះជូនគាត់អោយបានឆាប់។
ឯកឧត្តម លី ផល្លា ប្រធានក្រុមការងាររាជរដ្ឋាភិបាលចុះជួយស្រុកស្នួល មានប្រសាសន៍ផ្តាំផ្ញើដល់អាជ្ញាធរដែនដី សមត្ថកិច្ចគ្រប់លំដាប់ថ្នាក់រួមនិងប្រជាពលរដ្ឋ រស់នៅក្នុងមូលដ្ឋានត្រូវតែធ្វើយ៉ាងណាអោយមូលដ្ឋាន ភូមិឃុំយើងទទួលបានសុខសុវត្តិភាព មានការអភិវឌ្ឍ អោយកាន់តែរីកចំរើនឡើងបន្ថែមទៀត ត្រូវខិតខំប្រឹងប្រែងបន្ថែមទៀតដើម្បីលុបបំបាត់អោយអស់នូវចំណុចអវិជ្ជមានទាំងឡាយ ដែលប្រជាពលរដ្ឋបានលើកឡើង ខិតខំជួយដោះស្រាយរាល់ទុក្ខកង្វល់ បញ្ហាសុខភាព សន្តិសុខ សណ្ដាប់ធ្នាប់ និងការធ្វើអត្តសញ្ញាណប័ណ្ណ សៀវភៅគ្រួសារ សំបុត្រកំណើត សំបុត្រអាពាហ៍ពិពាហ៍អោយបានទាន់ពេលវេលាដោយគ្មានបង់ថ្លៃសេវាឡើយ ជាពិសេសសមត្ថកិច្ចទាំងអស់ត្រូវធ្វើការបង្ក្រាប់បទល្មើស លួច ឆក់ ប្លន់ បទល្មើសគ្រឿងញៀនស្របតាមគោលនយោបាយភូមិ ឃុំ សង្កាត់មានសុវត្ថិភាព ៕
