អភិបាលខេត្តពោធិ៍សាត់ អញ្ជើញសួរសុខទុក្ខជនរងគ្រោះទាំង ៤៦នាក់ ដែលជួបគ្រោះថ្នាក់ចរាចរណ៍ ករណីរថភ្លើងបុករថយន្តក្រុង នៅស្រុកក្រគរ

ភ្នំពេញ៖ ឯកឧត្ដម ខូយ រីដា អភិបាលខេត្តពោធិ៍សាត់ នៅថ្ងៃទី២៩ ខែមីនា ឆ្នាំ២០២៤ បានអញ្ជើញចុះសួរសុខទុក្ខ និង លើកទឹកចិត្តដល់ជនរងគ្រោះដែលជួបឧប្បវហេតុគ្រោះថ្នាក់ចរាចររថភ្លើងបុករថយន្តក្រុងដឹកអ្នកដំណើរកាលពីវេលាម៉ោង ១១ និង ០០ នាទីព្រឹកថ្ងៃទី ២៩ ខែ មីនា ឆ្នាំ ២០២៤ ស្ថិតនៅភូមិបំណត់ ឃុំឈើតុំ ស្រុកក្រគរ ខេត្តពោធិ៍សាត់។

ក្រោយកើតហេតុ ឯកឧត្ដម ខូយ រីដា អភិបាលខេត្តពោធិ៍សាត់ បានដឹកនាំមន្ត្រីក្រោមឱវាទចុះសួរសុខទុក្ខជនរងគ្រោះដែលកំពុងសម្រាកព្យាបាល និង សង្រ្គោះបន្ទាន់នៅមន្ទីរពេទ្យបង្អែកខេត្តពោធិ៍សាត់ចំនួន ១៨ នាក់ក្នុងនោះរបួសធ្ងន់ចំនួន ៥ នាក់ និង បានផ្តល់នូវថវិការមួយចំនួនជូនដល់ជនរងគ្រោះផងដែរ។

ជាមួយគ្នានោះ ឯកឧត្ដមអភិបាលខេត្តក៍បានលើកទឹកចិត្តដល់ជនរងគ្រោះទាំងអស់ត្រូវជឿជាក់លើក្រុមគ្រូពេទ្យ និង ខិតខំបន្តព្យាបាលនៅមន្ទីរពេទ្យបង្អែកខេត្តពោធិ៍សាត់អោយឆាប់បានជាសះស្បើយអោយបានគ្រប់ៗគ្នា។

ឯកឧត្ដមអភិបាលខេត្តពោធិ៍សាត់ក៍បានកោតសរសើរដល់ក្រុមគ្រួពេទ្យនៅមន្ទីរពេទ្យបង្អែកខេត្ត និង នៅមន្ទីរពេទ្យបង្អែកស្រុកក្រគរ ព្រមទាំងនៅមណ្ឌលសុខភាពឃុំឈើតុំដែលបានយកចិត្តទុកដាក់ខ្ពស់ក្នុងការជួយសង្រ្គោះចំពោះជនរងគ្រោះទាំងអស់បានទាន់ពេលវេលា។

ឯកឧត្ដមអភិបាលខេត្ត ក៏បានជូនពរ សូមអោយជនរងគ្រោះទាំងអស់ឆាប់បានជាសះស្បើយ និង បានវិលត្រឡប់ទៅលំនៅដ្ឋានរៀងៗខ្លួនវិញក្នុងពេលវេលាដ៍ឆាប់ៗខាងមុខនេះផងដែរ៕