ឯកឧត្តម ស្វាយ សំអ៊ាង និងឯកឧត្តម ឈាង ឡាក់ និងពុទ្ធបរិស័ទជិត៣ម៉ឺននាក់ ចូលរួមពិធីបុណ្យផ្កាប្រាក់សាមគ្គី នៅវត្គជោតិញារាម (ហៅវត្គគីឡូ ០៨) ក្នុងក្រុងស្ទឹងត្រែង

ស្ទឹងត្រែង៖ នៅព្រឹកថ្ងៃទី០១ ខែមេសា ឆ្នាំ២០២៤នេះ ឯកឧត្តម ស្វាយ សំអ៊ាង អភិបាលខេត្តស្ទឹងត្រែង និងឯកឧត្តម ឈាង ឡាក់ ប្រធានក្រុមប្រឹក្សាខេត្ត បានរៀបចំពិធីបុណ្យផ្កាប្រាក់សាមគ្គី នៅវត្គជោតិញារាម (ហៅវត្គគីឡូ ០៨) ស្ថិតនៅក្នុង សង្កាត់សាមគ្គី ក្រុងស្ទឹងត្រែង។

ពិធីបុណ្យផ្កាប្រាក់សាមគ្គី ក៏មានការនិមន្ត និងអញ្ជើញចូលរួមពី ព្រះអង្គ ធម្មវនវាសី ចន្ទ មុនី, ឯកឧត្តមសន្តិបណ្ឌិត ឡូយ សុផាត អ្នកតំណាងរាស្ត្រមណ្ឌលខេត្តស្ទឹងត្រែង និងប្រជាពលរដ្ឋ ដែលជាពុទ្ធបរិស័ទជិត ០៣ម៉ឺននាក់ ដែលរស់នៅក្នុងខេត្តស្ទឹងត្រែង និងប្រជាពលរដ្ឋមកពីបណ្តាលខេត្តជាប់ជាមួយខេត្តស្ទឹងត្រែងផងដែរ។

សូមជម្រាបជូនថា ពិធីបុណ្យផ្កាប្រាក់សាមគ្គីនេះ ក៏មានពិធីអភិសេដ រូបសំណាក់ព្រះពុទ្ធបដិមា ដែលមានទទឹងប្រវែង ២៧០សង់ទីម៉ែត្រ មានកម្ពស់ ២៧០សង់ទីម៉ែត្រ និងមានទម្ងន់ទៅដល់ ១០តោន ដែលយកតម្កល់ នៅបរិវេណវត្តផ្ទាល់ ដែលជាការផ្តួចផ្តើមឡើងដោយ ឯកឧត្តមអ្នកតំណាងរាស្រ្តមណ្ឌលស្ទឹងត្រែង និងលោកជំទាវ, ឯកឧត្តមប្រធានក្រុមប្រឹក្សាខេត្ត, ឯកឧត្តមអភិបាលខេត្តស្ទឹងត្រែង មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋខេត្តស្ទឹងត្រែង។

ដោយពិធី បុណ្យផ្កាប្រាក់សាមគ្គីនេះផងដែរប្រារព្ធឡើងក្នុងគោលបំណងដើម្បី ប្រមូលបច្ច័យយកទៅកសាងព្រះវិហារថ្មី ដែលកំពុងខ្វះខាតថវិកាក្នុងដំណើរសាងសង់បង្ហើយផងដែរ ៕