រដ្ឋមន្ត្រីក្រសួងកសិកម្ម លើកទឹកចិត្តឱ្យនិស្សិត ពង្រឹងសមត្ថភាពភាសាអង់គ្លេស និងកំព្យូទ័រ ដើម្បីចាប់យកឱកាសទៅហាត់ការនៅបរទេស
ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ក្នុងឱកាសអញ្ជើញជាអធិបតីក្នុងពិធីបើកបវេសនកាលឆ្នាំសិក្សា ២០២៣-២០២៤ របស់វិទ្យាស្ថានជាតិកសិកម្មកំពង់ចាម នៅរសៀលថ្ងៃទី០១ ខែមេសា ឆ្នាំ២០២៤ ឯកឧត្តមបានលើកទឹកចិត្តឱ្យប្អូនៗនិស្សិត ពង្រឹងសមត្ថភាពភាសាអង់គ្លេស និងកំព្យូទ័រ ព្រមទាំងជំនាញផ្នែកសេដ្ឋកិច្ចបន្ថែមទៀត ដើម្បីចាប់យកឱកាសទៅហាត់ការនៅបរទេស។
នៅក្នុងពិធីនេះ ឯកឧត្តមរដ្ឋមន្ត្រី បានផ្តល់អនុសាសន៍ណែនាំដល់ប្អូនៗ ពិនិត្យពិចារណាឱ្យបានល្អិតល្អន់ ចំពោះមុខជំនាញដែលខ្លួនបានជ្រើសរើស ដោយត្រូវជ្រើសសិក្សាមុខជំនាញដែលខ្លួនចូលចិត្ត ហើយអាចធានាបាននូវមុខរបរ ឬការងារសមរម្យ ដើម្បីទ្រទ្រង់ជីវភាព និងរួមចំណែកជួយអភិវឌ្ឍវិស័យកសិកម្ម នៅពេលរៀនចប់។
បន្ថែមលើមុខជំនាញគោលនៅក្នុងកម្មវិធីសិក្សានេះទៀតសោត ឯកឧត្តមរដ្ឋមន្ត្រី បានលើកទឹកចិត្តឱ្យប្អូនៗនិស្សិត ពង្រឹងសមត្ថភាពភាសាអង់គ្លេស និងកំព្យូទ័រ ព្រមទាំងជំនាញផ្នែកសេដ្ឋកិច្ចបន្ថែមទៀត ដើម្បីចាប់យកឱកាសទៅហាត់ការនៅបរទេស ដើម្បីទទួលបានបទពិសោធ ឆ្លើយតបទៅនឹងតម្រូវការទីផ្សារការងារ។
ឯកឧត្តមរដ្ឋមន្ដ្រី ក៏បានយកឱកាសនេះ ពន្យល់ដល់ប្អូនៗនិស្សិតអំពីគោលនយោបាយកសិកម្មរបស់រាជរដ្ឋាភិបាល ដែលផ្ដោតសំខាន់លើការធានាឱ្យបាននូវសន្តិសុខស្បៀង និងនិរន្តរភាពសេដ្ឋកិច្ចនិងបរិស្ថាន តាមរយៈកាត់បន្ថែមថ្លៃដើមផលិត និងការផលិតបែបគុណភាព តម្រូវតាមទីផ្សារ ព្រមទាំងមានតម្លៃបន្ថែមខ្ពស់។ ជារួម គឺធ្វើយ៉ាណាដើម្បីឱ្យប្រជាកសិករ និងប្រជាជនទាំងអស់ មានហូប មានប្រើ មានបាន និងមានរហូត៕
