សម្តេចធិបតី ហ៊ុន ម៉ាណែត៖ ការអប់រំត្រូវធ្វើឱ្យមួយជីវិត សូម្បីខ្ញុំក៏ត្រូវរៀនជាប់ជាប្រចាំដែរ
ភ្នំពេញ៖ ក្នុងឱកាសអញ្ជើញបិទសន្និបាតបូកសរុបការងារអប់រំ យុវជន និងកីឡាឆ្នាំ២០២២~២០២៣ និងលើកទិសដៅការងារឆ្នាំសិក្សា២០២៤ ” ក្រោមប្រធានបទ “ ឧត្ដមានុវត្តន៍នៃកំណែទម្រង់គ្រឹះស្ថានសិក្សា នាថ្ងៃទី២ មេសានេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងបញ្ជាក់ថា ការអប់រំត្រូវធ្វើឱ្យមួយជីវិត សូម្បីសម្តេចក៏ត្រូវរៀនជាប់ជាប្រចាំដែរ ។
សម្ដេចធិបតី មានប្រសាសន៍ថា អាណាព្យាបាលគ្រប់រូបចង់ឱ្យកូនៗ ទទួលបានការអប់រំដ៏ប្រសើរ ហើយដើម្បីឱ្យការអប់រំបានល្អប្រសើរ ត្រូវពង្រឹងមូលដ្ឋានពីថ្នាក់ក្រោមមក។ ការបង្កើតសាលាជំនាន់ថ្មី សាលាគំរូ មិនមែនជាការបង្កើតដើម្បីប្រកួតប្រជែងគ្នានោះទេ គឺបង្កើតដើម្បីពង្រឹងការអប់រំ ហើយធ្វើជាដំណាក់កាល។
សម្តេចធិបតី បានប្រកាសយកសាលាបឋមសិក្សាចំនួន៥០ ពង្រឹងការអប់រំ ដោយបន្ថែមម៉ោងសិក្សា ២ម៉ោងបន្ថែមទៀត។
សម្តេចធិបតី ហ៊ុន ម៉ាណែត ក៏បានណែនាំកុំឱ្យដាក់កាតព្វកិច្ចទៅអាណាព្យាបាលចូលរួមថវិកា ក្នុងកម្មវិធីលើកកម្ពស់អប់រំ។ ទំនាក់ទំនងរវាងគ្រូ អាណាព្យាបាល ជាមួយសិស្ស ជាកត្តាសំខាន់ជួយឱ្យការអប់រំទទួលបានផលល្អប្រសើរ ៕
