សម្តេចធិបតី ហ៊ុន ម៉ាណែត៖ ដើម្បីពង្រឹងវិស័យអប់រំឱ្យមានគុណភាពខ្ពស់ ត្រូវរៀបចំផែនការចាំបាច់ និងដាក់អនុវត្តឱ្យចំគោលដៅ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា ជាធម្មតា ការអនុវត្តផែនការ អត់ដូចលទ្ធផលដែលបានរំពឹងទុកទាំងអស់នោះទេ ពីព្រោះអ្នកអង្គុយសរសេរផែនការគោលនយោបាយ ត្រូវអង្គុយគិត ព្យាករមុន ប៉ុន្តែនៅពេលដាក់ចាត់តាំងអនុវត្ត នឹងអាចជួបប្រទះនូវបញ្ហាជាច្រើន។
ក្នុងឱកាសអញ្ជើញជាអធិបតីក្នុងពិធី «បិទសន្និបាតក្រសួងអប់រំ យុវជន និងកីឡា» នៅវិទ្យាស្ថានបច្ចេកវិទ្យាកម្ពុជា នៅថ្ងៃទី២ ខែមេសា ឆ្នាំ២០២៤ សម្តេចធិបតី ហ៊ុន ម៉ាណែត បានមានប្រសាសន៍ថា ការជួបបញ្ហាច្រើន ត្រូវការធ្វើការផ្គុំគ្នា បូកសរុប វាយតម្លៃ ផ្តល់យោបល់ ហើយធ្វើការកែសម្រួល និងពង្រឹងបន្ថែម ដើម្បីស្វែងរកចំណុចក្នុងការដោះស្រាយបញ្ហាទាំងនោះឱ្យមានប្រសិទ្ធភាព។
សម្តេចធិបតី បញ្ជាក់ថា សន្និបាតនេះគឺជាកិច្ចការសំខាន់ណាស់ដែលក្រសួង ស្ថាប័ន ត្រូវធ្វើការបូកសរុបវាយតម្លៃ ហើយសង្ឃឹមថា អ្វីដែលបានជាលទ្ធផលនៃការបូកសរុបលទ្ធផលការងារ នឹងដាក់ទិសដៅឱ្យចំគោលដៅដែលបានរំពឹងទុក ៕
