សហព័ទ្ធដែលជាប្រពន្ធ របស់សមាជិក ប.ស.ស. នឹងទទួលបានប្រាក់បំណាច់មាតុភាពពី ប.ស.ស. តាមរយៈការបង់ភាគទានដោយស័្មគ្រចិត្ត
ភ្នំពេញ៖ ដោយទទួលបានការអនុញ្ញាតពីសំណាក់ ឯកឧត្តម ម៉េង ហុង អគ្គនាយក ប.ស.ស.ស្ដីទី នៃក្រសួងការងារនិងបណ្ដុះបណ្ដាលវិជ្ជាជីវៈ នាព្រឹកថ្ងៃទី៤ ខែមេសា ឆ្នាំ២០២៤នេះ លោក សុក បូរ៉ា ប្រធាននាយកដ្ឋានតាវកាលិកសន្ដិសុខសង្គម បានអញ្ជើញធ្វើបទបង្ហាញ ស្ដីពីបច្ចុប្បន្នភាពថ្មីៗពាក់ព័ន្ធទៅនឹងរបបសន្តិសុខសង្គម ជូនដល់ថ្នាក់ដឹកនាំ និងមន្ត្រី នៃអង្គការសម្ព័ន្ធខ្មែរជំរឿនការពារសិទ្ធិមនុស្ស (LICADHO) សរុបប្រមាណជា ៨០រូប។
ក្នុងឱកាសនោះ លោក សុក បូរ៉ា បានបញ្ជាក់ឱ្យដឹងថា បច្ចុប្បន្នសម្រាប់ផ្នែកថែទាំសុខភាព សមាជិក ប.ស.ស. អាចនាំប្ដី ឬប្រពន្ធ និងកូនៗ មកចុះឈ្មោះជាអ្នកក្នុងបន្ទុករបស់ខ្លួន និងបង់ភាគទានដោយស័្មគ្រចិត្តបាន ដោយចំណាយថវិកា ១៥ ៦០០រៀលក្នុងមួយខែក្នុងម្នាក់ ដើម្បីឱ្យពួកគាត់ទទួលបានការគាំពារសុខភាព ដោយទទួលបានសេវាថែទាំ និងព្យាបាលជំងឺដោយឥតគិតថ្លៃ នៅតាមមន្ទីរពេទ្យដែលជាដៃគូរបស់ ប.ស.ស.។
លោក សុក បូរ៉ា បានឱ្យដឹងទៀតថា សម្រាប់ប្រពន្ធរបស់សមាជិក ប.ស.ស. នៅពេលដែលចុះឈ្មោះជាអ្នកក្នុងបន្ទុកសមាជិក ប.ស.ស. និងបង់ភាគទានដោយស័្មគ្រចិត្ត ផ្នែកថែទាំសុខភាពបានយ៉ាងតិច ៩ខែ នៅពេលសម្រាលមាតុភាព នឹងទទួលបានប្រាក់បំណាច់មាតុភាព ចំនួន ១ ២៦០ ០០០រៀល ពី ប.ស.ស. ដូចទៅនឹងបុគ្គលស្វ័យនិយោជន៍ដែរ៕
