ប្រមុខរាជរដ្ឋាភិបាល៖ ដើម្បីសម្រេចផែនការ លើកកម្ពស់ការងាររដ្ឋបាលសាធារណៈ គឺត្រូវមានចិត្តមួយ បេះដូងមួយ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា ដើម្បីសម្រេចបានផែនការ លើកកម្ពស់ការងាររដ្ឋបាលសាធារណៈ គឺត្រូវមានចិត្តមួយ មានបេះដូងតែមួយ ។

ក្នុងឱកាសអញ្ជើញ បិទសន្និបាតបូក សរុបការងារឆ្នាំ២០២៣ និងលើកទិសដៅការងារ សម្រាប់ឆ្នាំ២០២៤ របស់ក្រសួងមុខងារសាធារណៈ នាថ្ងៃទី៤ ខែមេសា ឆ្នាំ២០២៤នេះ សម្ដេចធិបតី ហ៊ុន ម៉ាណែត បញ្ជាក់ថា «កិច្ចការងារនេះ មិនមែនជាការងារសាមញ្ញ ទាមទារនូវការឯកភាពគ្នា ចិត្តមួយថ្លើមមួយ បេះដូងមួយ ចង់បាននូវទិសដៅមួយ គឺថាក្នុងរយៈពេល១០-១៥ឆ្នាំ ក្នុងកំណែទម្រង់ ពេលបញ្ចប់ នឹងមានប្រសិទ្ធភាពខ្លាំង»។

សម្តេចធិបតី មានប្រសាសន៍ថា កិច្ចការទាំងអស់ ត្រូវទាមទារនូវវានុវត្តន៍ បានន័យថា ការច្នៃប្រឌិតដើម្បីដោះស្រាយបញ្ហា ហើយបែបនេះ ត្រូវការភាពក្លាហាន នៅក្នុងការសម្រេចចិត្ត ដែលផ្ដើមចេញពីភាពក្លាហានរបស់មន្ត្រី នៅក្នុងក្រសួងមុខងារសាធារណៈតែម្ដង។

សម្តេចធិបតី ហ៊ុន ម៉ាណែត លើកឡើងថា ក្នុងរយៈពេល៧ខែនេះ សម្ដេចបានសង្កេតឃើញ និងសូមអរគុណចំពោះភាពក្លាហាន ម៉ឺនម៉ាត់ និងជំនាញខ្ពស់របស់មន្ត្រី ដែលចូលរួមនៅក្នុងការរៀបចំ ផែនការកំណែទម្រង់ របស់ក្រសួងមុខងារសាធារណៈផងដែរ ៕