ឯកឧត្តម អឿង ចន្ថា អនុរដ្ឋលេខាធិការក្រសួងធនធានទឹក ដឹកនាំគណៈប្រតិភូក្រសួងធ្វើទស្សនកិច្ចសិក្សាស្វែងយល់អំពីវិស័យឧតុនិយមអាកាសចរណ៍ស៊ីវិល

ភ្នំពេញ៖ នាថ្ងៃព្រហស្បតិ៍ ១១រោច ខែផល្គុន ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី៤ ខែមេសា ឆ្នាំ២០២៤ ឯកឧត្តមបណ្ឌិត អឿង ចន្ថា អនុរដ្ឋលេខាធិការ បានដឹកនាំគណៈប្រតិភូ ក្រសួងធនធានទឹក និងឧតុនិយមធ្វើទស្សនកិច្ចសិក្សាស្វែងយល់អំពីកិច្ចដំណើរការ និងការប្រើប្រាស់ឧបករណ៍បច្ចេកវិទ្យាសម្រាប់វិស័យឧតុនិយម ដែលជួយដល់ការងារអាកាសចរណ៍ស៊ីវិលនៅរដ្ឋលេខាធិការដ្ឋានអាកាសចរណ៍ស៊ីវិល នៃព្រះរាជាណាចក្រកម្ពុជា។

ឯកឧត្តមអនុរដ្ឋលេខាធិការ បានឱ្យដឹងថា គោលបំណងនៃទស្សនកិច្ចសិក្សាគឺ៖ ១).ស្វែងយល់អំពីកិច្ចដំណើរការនិងការប្រើប្រាស់ឧបករណ៍បច្ចេកវិទ្យាសម្រាប់វិស័យឧតុនិយមអាកាសចរណ៍ស៊ីវិល, ២).ពង្រឹងកិច្ចសហប្រតិបត្តិការរវាងស្ថាប័នទាំងពីរឱ្យកាន់តែមានភាពជិតស្និទ្ធលើវិស័យឧតុនិយម, ៣).ចែករំលែកបទពិសោធន៍ ការអនុវត្តល្អកន្លងមក និងរៀនសូត្រពីកំហុសឆ្គងផ្សេងៗ និង៤).ពិភាក្សាជំរុញឱ្យមានកិច្ចព្រមព្រៀងរវាងស្ថាប័នជំនាញទាំងពីរលើវិស័យឧតុនិយម។

ជាមួយគ្នានេះដែរ ឯកឧត្តមអនុរដ្ឋលេខាធិការបានបន្តឱ្យដឹងថា ភាគីទាំងពីរបានពិភាក្សាលើការងារមួយចំនួនដូចជា៖ ១).ការពិនិត្យលទ្ធភាព និងជំរុញកិច្ចព្រមព្រៀងរវាងស្ថាប័នទាំងពីរ ដែលមិនទាន់បានចុះហត្ថលេខាតាំងពីអាណត្តិកន្លងមក, ២).លទ្ធភាពទទួលបាននូវវគ្គបណ្តុះបណ្តាលនានាទាក់ទងនឹងអាកាសចរណ៍ស៊ីវិលរបស់អង្គការឧតុនិយមពិភពលោក តារយៈការសម្របសម្រួលពីក្រសួងធនធានទឹក និងឧតុនិយម ដែលជាតំណាងអចិន្ត្រៃយ៍ និង៣).ពិចារណាប្រើប្រាស់ប្រព័ន្ធព័ត៌មានដូចគ្នា ឬប្រព័ន្ធព័ត៌មានដែលអនុញ្ញាតឱ្យមានការរួមបញ្ចូលបាន។

ជាលទ្ធផល ឯកឧត្តម អឿង ចន្ថា បានបញ្ជាក់ថា ភាគីទាំងពីរបានឯកភាពគ្នាលើចំណុចទាំង៣ ខាងលើ និងប្ដេជ្ញាពង្រឹងកិច្ចសហប្រតិបត្តិការរវាងស្ថាប័នទាំងពីរឱ្យកាន់តែមានភាពប្រសើរឡើងលើវិស័យឧតុនិយមអាកាសចរណ៍ស៊ីវិល ដើម្បីពង្រឹងការព្យាករធាតុអាកាសបន្ថែមទៀត បម្រើដល់ការធ្វើដំណើរតាមផ្លូវអាកាសប្រកបដោយសុខសុវត្ថិភាព ៕