ប្រតិភូអង្គការ People For Care And Learning ទស្សនកិច្ចសិក្សាស្វែងយល់អំពីតួនាទី និងភារកិច្ចរបស់រដ្ឋសភាកម្ពុជា

ភ្នំពេញ៖ នៅវិមានរដ្ឋសភា នាព្រឹកថ្ងៃទី៥ ខែមេសា ឆ្នាំ២០២៤ ឯកឧត្តម ច័ន្ទ សុផល ប្រធានស្តីទីគណៈកម្មការមហាផ្ទៃ ការពារជាតិ មុខងារសាធារណៈ និងកិច្ចការព្រំដែន នៃរដ្ឋសភា (គណៈកម្មការទី៤) បានទទួលជួបសំណេះសំណាលជាមួយគណៈប្រតិភូអង្គការ People for Care and Learning(PCL) ចំនួន ២១នាក់ ដឹកនាំដោយ​ លោក Travis Johnson Christian ប្រធានអង្គការ PCL ប្រចាំសហរដ្ឋអាមេរិក ដែលបានមកធ្វើទស្សនកិច្ចសិក្សាស្វែងយល់ពី “តួនាទី និងភារកិច្ចរបស់រដ្ឋសភា នៃព្រះរាជាណាចក្រកម្ពុជា”។

លោក Travis Johnson Christian បានថ្លែងអំណរគុណយ៉ាងជ្រាលជ្រៅជូនចំពោះ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា ដែលបានអនុញ្ញាតឱ្យគណៈប្រតិភូអង្គការ People for Care and Learning(PCL) ធ្វើទស្សនកិច្ចសិក្សាស្វែងយល់អំពីរដ្ឋសភានាពេលនេះ។ លោក Travis Johnson Christian បានបន្ថែមថា ការមកធ្វើទស្សនកិច្ចនេះមានគោលបំណងចង់សិក្សាស្វែងយល់ឱ្យកាន់តែស៊ីជម្រៅបន្ថែមទៀតអំពីច្បាប់ និងតួនាទីភារកិច្ចរបស់រដ្ឋសភា នៃព្រះរាជាណាចក្រកម្ពុជា។

ក្នុងឱកាសនោះដែរ ឯកឧត្តម ច័ន្ទ សុផល បានសម្តែងនូវកិច្ចស្វាគមន៍យ៉ាងកក់ក្តៅចំពោះលោក Travis Johnson Christian ដែលបានដឹកនាំគណៈប្រតិភូអង្គការ People for Care and Learning ពីសហរដ្ឋអាមេរិក មកបំពេញទស្សនកិច្ចនៅកម្ពុជា និងឆ្លៀតឱកាសមកសិក្សាស្វែងយល់អំពីរដ្ឋសភា ជាស្ថាប័នកំពូលរបស់ព្រះរាជាណាចក្រកម្ពុជា នាពេលនេះ។ ឯកឧត្តម ច័ន្ទ សុផល បានលើកឡើងថានៅឆ្នាំ២០២៣កន្លងទៅនេះគឺជាការបោះឆ្នោតរដ្ឋសភានីតិកាលទី៧ ដែលមាន គណបក្សនយោបាយ ចំនួន១៨ចូលរួម ហើយគណបក្សប្រជាជនកម្ពុជាទទួលបាន អាសនៈ ១២០ អាសនៈ និងគណបក្សហ៊្វុនស៊ិនប៉ិច ទទួលបាន ៥ អាសនៈ ក្នុងនោះតំណាងរាស្ត្រជាស្ត្រីមានចំនួន ១៧រូប ស្មើនឹង ១៣,៦%។

ជាមួយគ្នានេះ​ ឯកឧត្តម ក៏បានរំលេចដោយសង្ខេបអំពីរចនាសម្ព័ន្ធគ្រប់គ្រងរបស់រដ្ឋសភា ក្នុងនោះរដ្ឋសភានីតិកាលទី៧គឺ ដឹកនាំដោយសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា ជាស្រ្តីទី១ ក្នុងប្រវត្តិសាស្រ្តកម្ពុជា ដែលទទួលបាននូវតួនាទីដ៏ឧត្តុងឧត្តមនេះ។ ឯកឧត្តម ក៏បានធ្វើការបទបង្ហាញអំពីប្រវត្តិនៃការកកើតសភា ដំណើរការវិវត្តន៍របស់សភា និងជាពិសេសអំពីតួនាទីស្នូលរបស់រដ្ឋសភាកម្ពុជា ក្នុងការរួមចំណែកពង្រឹងនីតិរដ្ឋ លើកកម្ពស់លទ្ធិប្រជាធិបតេយ្យ និងការអភិវឌ្ឍជាតិ។ ឯកឧត្តម បានសង្កត់ធ្ងន់ថា តំណាងរាស្រ្តមានតួនាទី ភារកិច្ចសំខាន់ចំនួន៣គឺ នីតិកម្ម (តាក់តែង និងអនុម័តច្បាប់) តាមដានការអនុវត្តច្បាប់របស់រាជរដ្ឋាភិបាលនិងភាពជាតំណាងប្រជាពលរដ្ឋ។ រដ្ឋសភាអនុម័តច្បាប់រដ្ឋធម្មនុញ្ញ ឬលើកអភ័យឯកសិទ្ធិសភា ឬប្រកាសបន្តនីតិកាលរដ្ឋសភាមួយដងបានមួយឆ្នាំដោយ សម្លេង ពីរភាគបី នៃចំនួនសមាជិករដ្ឋសភាទាំងមូល។

ឯកឧត្តម បានបន្តទៀតថា រដ្ឋសភាប្រជុំជាសមញ្ញ២ លើកក្នុងមួយឆ្នាំ ដែលក្នុងមួយលើកៗ មានរយៈពេល ៣ខែ ក្រៅពីការអនុម័តច្បាប់ តំណាងរាស្ត្រទាំងអស់ត្រូវចុះតាមមូលដ្ឋាន ដើម្បីតាមដានការអនុវត្តច្បាប់របស់រាជរដ្ឋាភិបាល ចុះសួរសុខទុក្ខប្រជាពលរដ្ឋតាមមូលដ្ឋាន រួមទាំងជួយសម្របសម្រួល ដោះស្រាយរាល់បញ្ហាប្រឈមផ្សេងៗ របស់ប្រជាពលរដ្ឋ។
លោក Travis Johnson Christian បានសម្តែងនូវការអរគុណចំពោះឯកឧត្តម ច័ន្ទ សុផល ដែលបានទទួលប្រតិភូអង្គការ People for Care and Learning(PCL) យ៉ាងកក់ក្តៅបំផុត។ លោកបានបន្តថាអង្គការ People for Care and​ Learning(PCL)របស់យើងមានសាលារៀន វិឡាស្ថាន កសិដ្ឋាន និងភោជនីយដ្ឋាន ក្នុងការជួយដល់ក្មេងកំព្រា ការកាត់បន្ថយភាពក្រីក្រ បន្តជំរុញយុវជនកម្ពុជាក្នុងការបណ្តុះបណ្តាល ។

លោកបានបន្តទៀតថាអង្គការ(PCL) បានមកជួយធ្វើការនៅក្នុងប្រទេសកម្ពុជាបាន២២ឆ្នាំ ហើយចាប់ផ្តើមដំបូងគឺជួយមណ្ឌលក្មេងកំព្រាមួយនៅខេត្តសៀមរាប។ លោក​ Travis Johnson Christian មានប្រសាសន៍ទៀតថា​ ប្រតិភូអង្គការ(PCL)របស់យើងបន្តពង្រីកសាលានៅក្នុងប្រទេសកម្ពុជា ក្នុងនោះនឹងបង្កើតសាលាមួយនៅក្នុងស្រុកពួក ខេត្តសៀមារាប និងបន្តជួយសាលាមួយទៀតនៅខេត្តបាត់ដំបង។

លោកTravis Johnson Christian បានលើកឡើងថា យុវជនដែលបានមកបណ្តុះបណ្តាលនៅក្នុងអង្កការ(PCL) អ្នកខ្លះកា្លយជាវេជ្ជ:បណ្ឌិត មេធាវី គ្រូបង្រៀន និងយុវជនខ្លះក្លាយជាថ្នាក់ដឹកនាំនៅក្នុងស្ថាប័នរដ្ឋមួយចំនួនផងដែរ។

ឯកឧត្តម ច័ន្ទ សុផល បានថ្លែងអំណរគុណដល់ប្រតិភូអង្គការ People for Care and Learning(PCL) ដែលបានជួយដល់ប្រទេសកម្ពុជាកន្លងមក ហើយឯកឧត្តមបានលើកទឹកចិត្តឱ្យអង្គការ(PCL)​ បន្តជួយដល់កម្ពុជា ដើម្បីជួយជំរុញឱ្យយុវជន​ និងក្មេងកំព្រាបានរៀនសូត្រ​ និងមានអនាគតល្អប្រសើរ។
ក្នុងឱកាសនោះដែរ គណៈប្រតិភូអង្គការ People for Care and Learning(PCL) ក៏បានទស្សនាសាលប្រជុំពេញអង្គរដ្ឋសភា សាលពិព័រណ៍ បណ្ណាល័យ និងកន្លែងសំខាន់ៗមួយចំនួនទៀតផងដែរ​ ៕