បង្ក្រាបទីតាំង KTV ចំនួន២កន្លែង នៅក្រុងប៉ោយប៉ែត លួចបើកឲ្យភ្ញៀវប្រើប្រាស់ថ្នាំញៀន

ភ្នំពេញ៖ ឯកឧត្តម កើត វណ្ណារ៉េត ព្រះរាជអាជ្ញាអមសាលាដំបូងខេត្ត លោក សំរិត សុខុន ព្រះរាជអាជ្ញាររង លោកឧត្តមសេនីយ៍ទោសិទ្ធិ ឡោះ ស្នងការនគរបាលខេត្តបានដឹកនាំបញ្ជាផ្ទាល់កម្លាំងចម្រុះនៃស្នងការដ្ឋាននគរបាលខេត្តបន្ទាយមានជ័យ មាន កម្លាំងផែននគរបាលព្រហ្មទណ្ឌ កម្លាំងផែនប្រឆាំងគ្រឿងញៀន កម្លាំងផែនការងារអន្តោប្រវេសន៍ កម្លាំងអធិការដ្ឋានក្រុងប៉ោយប៉ែត និងកម្លាំង វរសេនាតូចនគរបាលការពារព្រំដែន សរុបចំនួន១១៨នាក់ បានចុះបង្ក្រាបទីតាំង KTV ចំនួន២កន្លែង រួមមាន៖ KTV B9 និង  KTV Lamboghini នៅសង្កាត់អូរជ្រៅ ក្រុងប៉ោយប៉ែត នៅយប់ថ្ងៃទី០៥ ខែ មេសា ឆ្នាំ២០២៤ ចន្លោះម៉ោង ១.០០នាទីរំលងអាធ្រាតនិងបានឃាត់ខ្លួនមនុស្សប្រុស ស្រី ជាច្រើនរូបយកទៅសួរនាំ ក្រោយពីរកឃើញថា មានលួចបើកឲ្យភ្ញៀវប្រើប្រាស់ថ្នាំញៀន ។

ជាលទ្ធផលឃាត់ខ្លួនជនសង្ស័យសរុបរួមបានចំនួន១៧២នាក់ ស្រី៧៧នាក់ (ក្នុងនោះមានជនជាតិ ឥណ្ឌូនេស៊ីចំនួន៣៣នាក់/ស្រី០៥នាក់, ជនជាតិថៃ១៧នាក់/ស្រី១៤នាក់,ជនជាតិវៀតណាម០៣នាក់ប្រុស, ជនជាតិម៉ាឡេស៊ី ១២នាក់ ភេទប្រុស ,ជនជាតិកូរ៉េ០៤នាក់ ភេទប្រុស  នឹងបានដកហូតវត្ថុតាងសរុប៖ ១.ម្សៅម៉ត់ ស ថ្លាសង្ស័យជាសារធាតុញៀនចំនួន០៨កូនថង់ ,២. ថ្នាំកញ្ចប់រូបផ្លែត្របែក ១៣កញ្ចប់, ៣.ថ្នាំក្ញចប់ រូបទំពាំងបាយជូរ ១៧ កញ្ចប់ ,៤.ថ្នាំកញ្ចប់ពណ៌ក្រហម ២កញ្ចប់ ,៥.ថ្នាំកញ្ចប់រូបពណ៌ទឹកមាស ៣កញ្ចប់ ,៦.ថ្នាំគ្រាប់ ពណ៌ផ្កាឈូក ២៣គ្រាប់ ,៧.ថ្នាំគ្រាប់ពណ៌ខៀវ ១៩គ្រាប់, ៨ ម្សៅម៉ត់ស ៥ថង់តូច ,៩.បារីអេឡេត្រូនីច ១២ និងឧបរកណ៍សំរាប់ប្រើប្រាស់គ្រឿងញៀនមួយចំនួន  ម៉ូតូចំនួន៣៤គ្រឿង  រថយន្តចំនួន២គ្រឿង។

បន្ទាប់មកកម្លាំងសមត្ថកិច្ចបាននាំខ្លួនជនសង្ស័យទាំងអស់មកកាន់ទីបញ្ជាការវរសេនាតូចការពារព្រំដែនគោក៨៩១ដើម្បីសួរនាំធ្វើតេស្តទឹកនោម នឹងបន្តនីតិវិធី ក្រោមការចង្អុលបង្ហាញពីលោកឧត្តមសេនីយ៍ទោស្នងការ បានប្រគល់ជនសង្ស័យជាជនជាតិបរទេសចំនួន៦៩នាក់ ទៅផែនការងារអន្តោប្រវេស្តដើម្បីបន្តនីតិវិធី នឹងជនសង្ស័ងចំនួន៦០នាក់មកការិយាល័យប្រឆាំងគ្រឿងញៀន ចំណែកឯអ្នកដែលមិនពាក់ព័ន្ធនឹងមិនមានសារធាតុញៀនក្នុងខ្លួន ត្រូវបានឯកឧត្តមព្រះរាជអាជ្ញាអនុញ្ញាតអោយទៅសហគមន៍វិញចំននួន៣៦នាក់។ មួយចំនួនកំពុងស្ថិតក្រោមការសួរនាំរបស់សមត្ថកិច្ច ដើម្បីកសាងសំណុំរឿងបញ្ជូនទៅតុលាការចាត់ការតាមច្បាប់៕