នាយករដ្ឋមន្ត្រី ហ៊ុន ម៉ាណែត៖ បច្ចុប្បន្នយើងធ្វើអ្វីៗ គឺផ្អែកវិទ្យាសាស្ដ្រទាំងអស់ មិនអាចយកគ្រូទាយ មកទស្សន៍ទាយបានឡើយ
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានថ្លែងថា បច្ចុប្បន្នយើងធ្វើអ្វីៗ គឺផ្អែកវិទ្យាសាស្ដ្រទាំងអស់ មិនអាចយកគ្រូទាយ មកទស្សន៍ទាយបានឡើយ ។
នាឱកាសអញ្ជើញបិទសន្និបាត បូកសរុបលទ្ធផល ការងារឆ្នាំ២០២៣ និងលើកទិសដៅ អនុវត្តការងារឆ្នាំ២០២៤ របស់ក្រសួងផែនការ នាថ្ងៃទី៩ មេសា សម្ដេចធិបតី ហ៊ុន ម៉ាណែត បញ្ជាក់ថា «ខ្ញុំ យល់ស្របតាម ឯកឧត្តមរដ្ឋមន្ដ្រីក្រសួងផែនការ អំពីសារៈសំខាន់អំពីភាពចាំបាច់ មិនអាចខ្វះបាននូវ ការងារផែនការ ស្ថិតិនិងប្រជាជន និងការអភិវឌ្ឍ ។ ខ្ញុំសូមផ្ដល់ទស្សនៈផ្ទាល់ខ្លួន ដោយធ្វើការប្រៀបធៀបការងារ ផែនការស្ថិតិដែលមិនអាចខ្វះបាន ហើយត្រូវការគ្នាទៅវិញទៅមក។ ទិន្នន័យត្រឹមត្រូវធ្វើឲ្យយើងដាក់ចេញផែនការត្រឹមត្រូវ ។ ទិន្នន័យគ្រប់ជ្រុងជ្រោយធ្វើ ឲ្យយើងដាក់ចេញផែនការ ដែលធានានូវនិរន្ដរភាព ប្រសិទ្ធភាពនៃការអភិវឌ្ឍ។ បច្ចុប្បន្ន យើងធ្វើអ្វីផ្អែក វិទ្យាសាស្ដ្រទាំងអស់ យើងអត់អាចយកគ្រូទាយ មកទាយថា ត្រូវឆ្នាំក្រោយធ្វើអីត្រូវនោះទេ យើងត្រូវមានផែនការ យូរអង្វែង នឹងតាមដានអភិវឌ្ឍន៍វិស័យសេដ្ឋកិច្ច និងការប្រែប្រួលលើពិភពលោក វិស័យនយោបាយ និងសន្ដិសុខជាតិ»។
សម្ដេចធិបតីមានប្រសាសន៍ថា បើយើងរៀបចំផែនការតាមអារម្មណ៍ តាមការនឹកឃើញ មួយឆ្នាំម្ដង ពីរឆ្នាំម្ដងដែលគ្មានទិសដៅ រយៈពេលវែងទេ យើងនឹងវ៉ុលហើយ ធនធានមនុស្សយើងក៏មិនធានាបានដូចគ្នា ។ ដូច្នេះផែនការនេះ គឺសំខាន់ ហើយសំខាន់ទៅលើការរៀបចំប្រមូលវិភាគទិន្នន័យ បានច្បាស់លាស់។ ចំណែ ការងារប្រជាជន និងការអភិវឌ្ឍ ប្រៀបដូចទៅនឹង ដងខ្លួនមនុស្សទាំងមូល ។ ក្នុងន័យនេះ ការរៀបចំផែនការមួយមាន លក្ខណៈគ្រប់ជ្រុងជ្រោយ គឺឆ្លើយតបទៅនឹងតម្រូវការសង្គម៕
