សម្តេចធិបតី ហ៊ុន ម៉ាណែត ទទួលយកសំណើរដ្ឋមន្ត្រីក្រសួងផែនការ សុំពង្រីកទីតាំងក្រសួងទុកសិន

ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានទទួលយកសំណើរបស់ឯកឧត្ដម ប៊ិន ត្រឈៃ រដ្ឋមន្ត្រីក្រសួងផែន លើការស្នើសុំពង្រីកទីតាំងក្រសួង ប៉ុន្តែមិនទាន់ឆ្លើយតបបែបណានៅឡើយ ។

ក្នុងពិធីបិទសន្និបាតបូកសរុបលទ្ធផលការងារ ឆ្នាំ២០២៣ និងលើកទិសដៅអនុវត្តការងារឆ្នាំ២០២៤ របស់ក្រសួងផែនការ នាថ្ងៃទី៩ មេសា ឯកឧត្ដម ប៊ិន ត្រឈៃ បានលើកឡើងថា «មន្ត្រីរាជការ និងថ្នាក់ដឹកនាំ នៃក្រសួងផែនការ ពិតជាមានការលំបាកអំពីទីតាំង ចំណតរថយន្ត និងម៉ូតូ ក៏ដូចជាការិយាល័យធ្វើការ ក្រសួងផែនការ មានទីតាំងល្អ ចំណុចល្អកណ្តាលក្រុងភ្នំពេញ ប៉ុន្តែមានទីតាំងតូចចង្អៀត ដែលមានការលំបាកក្នុងការពង្រីក ។ ការត្អូញត្អែលរបស់មន្ត្រីរាជការ ពិតជាបានជះឥទ្ធិពល មិនសូវល្អដល់សតិអារម្មណ៍របស់ថ្នាក់ដឹកនាំ ក្នុងការអនុវត្តកំណែរទម្រង់រដ្ឋបាលសាធារណៈ ដើម្បីពង្រឹងសមត្ថភាពមន្ត្រីរាជការ និងស្ថាប័ន ។ ខ្ញុំបាទមិនមានបំណងត្អូញត្អែរ និងដាក់បន្ទុកបន្ថែមដល់សម្តេចធិបតី នាយករដ្ឋមន្ត្រីនោះទេ គ្រាន់តែជាការគិតគូ សម្រាប់អនាគត ក្នុងករណីរាជរដ្ឋាភិបាលមានលទ្ធភាព ពង្រឹងទីតាំងរដ្ឋបាលសាធារណៈ ខ្ញុំសូមគោរពស្នើសុំសម្តេចធិបតី មេត្តាគិតគូដល់ក្រសួងផែនការ ដែលជាអាទិភាពមួយផងដែរ ដែលជាក្រសួងខួរក្បាលគិតគូអំពីគោលនយោបាយ ផែនការយុទ្ធសាស្ត្រអភិវឌ្ឍន៍ជាតិ សម្រាប់អភិវឌ្ឍន៍សង្គម សេដ្ឋកិច្ចជាតិយើងទាំងមូល »។

ជាមួយគ្នានោះសម្តេចធិបតី បានបញ្ជាក់ទៅរដ្ឋមន្ត្រីវិញថា សំណើនេះ សម្តេចទទួលយកមកទុក នឹងពិចារណាតាមក្រោយ ។ សម្តេចក៏ទទួលស្គាល់ថា ក្រសួងពិតជាជួបការលំបាក ក្នុងការចតយាន្តយន្តរបស់មន្ត្រីអនុវត្តការងារ នៃក្រសួងផែនការពិតមែន ស្របពេលរាជរដ្ឋាភិបាល ត្រូវការគិតគូឲ្យល្អិតល្អមុននឹងសម្រេចចិត្ត ។

សម្តេចធិបតី បញ្ជាក់ថា “ខ្ញុំទទួលសំណើ តែខ្ញុំមិនទាន់ឆ្លើយទេ” ៕