ក្រសួងធម្មការនិងសាសនា រៀបចំពិធីចម្រើនព្រះបរិត្ត សិរីសួស្ដីជ័យមង្គល ក្នុងពិធីសង្រ្កាន្តឆ្នាំថ្មីប្រពៃណីជាតិខ្មែរ
ភ្នំពេញ៖ នៅព្រឹកថ្ងៃទី១០ ខែមេសា ឆ្នាំ២០២៤ ឯកឧត្តម ចាយ បូរិន រដ្ឋមន្រ្តីធម្មការនិងសាសនានិងលោកជំទាវ សូ ភក្រ្តា ចាយបូរិន រួមទាំងថ្នាក់ដឹកនាំ មន្រ្តីរាជការ នៃក្រសួងធម្មការនិងសាសនាទាំងអស់ បាននិមន្តព្រះសង្ឃរៀបចំពិធីចម្រើនព្រះបរិត្តសិរីសួស្ដីជ័យមង្គល ក្នុងពិធីសង្រ្កាន្តឆ្នាំថ្មី ប្រពៃណីជាខ្មែរក្រសួងធម្មការនិងសាសនា ដើម្បីត្រៀមទទួលអំណរឆ្នាំថ្មី ឆ្នាំរោង ឆស័ក ព.ស.២៥៦៧ដែលនឹងឈានចូលមកដល់នៅថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៤ ខាងមុខនេះ នាទីស្តីការក្រសួង។
នាឱកាសខិតជិតមកដល់ពិធីចូលឆ្នាំថ្មីប្រពៃណីជាតិខ្មែរនាពេលខាងមុខ ឯកឧត្តម ចាយ បូរិន រដ្ឋមន្រ្តីក្រសួងធម្មការនិងសាសនា និងលោកជំទាវ បានដឹកនាំរៀបចំពិធីចម្រើនព្រះបរិត្តសិរីសួស្ដីជ័យមង្គល ក្នុងពិធីសង្រ្កាន្តឆ្នាំថ្មី ប្រពៃណីជាខ្មែរ និងរាប់បាត្រ ប្រគេនទេយ្យទានព្រះសង្ឃ ដើម្បីសុំពរជ័យ សិរីសួស្តី ជ័យមង្គល ដល់ថ្នាក់ដឹកនាំ មន្រ្តីរាជការក្រសួងធម្មការនិងសាសនាទាំងអស់។
ពិធីចម្រើនព្រះបរិត្តសិរីសួស្ដីជ័យមង្គល ក្នុងពិធីសង្រ្កាន្តឆ្នាំថ្មី ប្រពៃណីជាខ្មែរក្រសួងធម្មការនិងសាសនា បានប្រារព្ធឡើងទៅតាមគន្លងប្រពៃណីព្រះពុទ្ធសាសនាដ៏ផូរផង់ ដោយមានការបូជាទៀនធូប ផ្កាភ្ញី គ្រឿងសក្ការៈនានា ថ្វាយព្រះរតនត្រៃ និងបាននិមន្តសម្តេចព្រះសង្ឃ ចម្រើនព្រះបរិត្ត ស្វាធ្យាយជយន្តោ ពុទ្ធជ័យមង្គល ជាកិច្ចជូន ដំណើរឆ្នាំចាស់ និងទទួលអំណរសាទរឆ្នាំថ្មី ឆ្នាំរោង ឆស័ក ព.ស.២៥៦៧ជាពិសេសត្រៀមទទួលដំណើរយាងរបស់ទេវព្តាឆ្នាំថ្មីព្រះនាម មហោទរាទេវីដែលនិងយាងចុះមកថែរក្សាមនុស្សលោកនៅថ្ងៃសៅរ៍ ៥កើត ខែចេត្រ ត្រូវនឹងថ្ងៃទី១៣ ខែមេសា ឆ្នាំ២០២៤ វេលាម៉ោង ២២.១៧នាទីនិង២៤វិនាទីយប់ ។
ជាមួយគ្នានេះដែរនេះ ឯកឧត្តម រដ្ឋមន្រ្តី និងលោកជំទាវ បានសំណេះសំណាលសួរសុខទុក្ខ ថ្នាក់ដឹកនាំ មន្រ្តីរាជការរបស់ក្រសួងធម្មការនិងសាសនា និងកោតសរសើរ ចំពោះការខិតខំបំពេញការងារយ៉ាងសកម្មរបស់មន្រ្តីរាជការក្រសួងនាពេលកន្លងមក និងសូមឲ្យខិតខំបន្តទៀតដើម្បីអភិវឌ្ឍន៏សកម្មភាពការងារក្រសួងធម្មការនិងសាសនាកាន់តែរីកចម្រើនបន្តទៀត។
ជាការលើកទឹកចិត្តដល់មន្រ្តីរាជការ និងក្នុងឱកាសអបអរសាទរឆ្នាំថ្មី ឯកឧត្តម ចាយ បូរិន និងលោកជំទាវ បានអញ្ជើញចែកអំណោយដល់មន្រ្តីរាជការក្រសួងធម្មការនិងសាសនា និងនិវត្តន៍ជន ព្រមទាំងជូនពរដល់មន្រ្តីរាជទាំងអស់ជួបតែ សេចក្តីសុខ សុវត្ថិភាព នុងពុទ្ធពរទាំង៤ប្រការគឺ អាយុ វណ្ណៈ សុខៈ ពលៈ ព្រមទាំងជោគជ័យគ្រប់ភារកិច្ចទាំងអស់ក្នុងឱកាសឆ្នាំថ្មីខាងមុខ៕
