រដ្ឋមន្ត្រីក្រសួងផែនការ អញ្ជើញជួបប្រជុំ និងសំណេះសំណាលការងារជាមួយប្រធានមន្ទីរផែនការរាជធានី-ខេត្ត

ភ្នំពេញ៖ នាព្រឹកថ្ងៃទី០៩ ខែមេសា ឆ្នាំ២០២៤ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ បានអញ្ជើញជួបប្រជុំ និងសំណេះសំណាលការងារជាមួយប្រធានមន្ទីរផែនការរាជធានី-ខេត្ត នៅទីស្តីការក្រសួងផែនការ។

កិច្ចប្រជុំនេះ មានគោលបំណងដើម្បីពិភាក្សាការងារមួយចំនួនពាក់ព័ន្ធនឹងយន្តការធ្វើអត្តសញ្ញាណកម្មគ្រួសារក្រីក្រ នៅតាមបណ្តាលរាជធានី-ខេត្ត និងមានពិធីតំណាងនៃការប្រគល់ទទួលតាប្លេត (Tablet) ដល់មន្ទីរផែនការរាជធានី ខេត្ត សម្រាប់កម្មវិធីកំណត់អត្តសញ្ញាណគ្រួសារក្រីក្រ ដែលជាឧបករណ៍មានលក្ខណៈស្តង់ដាររួមមួយ សម្រាប់ស្ថាប័ននានា ដែលចង់កំណត់គោលដៅផ្ដល់សេវាសង្គមនានាដល់គ្រួសារក្រីក្រ និងងាយរងហានិភ័យនៅក្នុងប្រទេសកម្ពុជា។

ឆ្លៀតក្នុងឱកាសដ៏វិសេសវិសាលនេះផងដែរ មន្ទីរផែនការរាជធានី-ខេត្ត បានចូលរួមសម្តែងនូវអំណរសាទរប្រកបដោយមោទកភាព ចំពោះជោគជ័យដ៏មានសារៈសំខាន់នៃពិធីសន្និបាតរបស់ក្រសួងផែនការនាឱកាសនេះ ដែលជាមោទនភាពថ្មីមួយសម្រាប់ថ្នាក់ដឹកនាំ និងមន្ត្រីរាជការក្រោមឱវាទ និងបានគោរពជូនសព្ទសាធុការពរចំពោះ ឯកឧត្តមរដ្ឋមន្ត្រី ព្រមទាំងថ្នាក់ដឹកនាំនៃអង្គភាពថ្នាក់ជាតិ នៃក្រសួងផែនការ ក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិ ដែលនឹងឈានចូលមកដល់នាពេលខាងមុខនេះ ៕