សម្តេចធិបតី៖ ត្រីមាសទី១ ឆ្នាំ២០២៤ កម្ពុជាអនុម័តគម្រោងថ្មី និងគម្រោងពង្រីកផលិតកម្ម ១០៦គម្រោង ដែលមានទុនវិនិយោគ ២.២ពាន់លានដុល្លារ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា បើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា (CDC) គម្រោងវិនិយោគចំនួន ២៦៨គម្រោង ត្រូវបានអនុម័តក្នុងឆ្នាំ២០២៣ ក្នុងនោះមានគម្រោងថ្មីចំនួន២៤៧ និងគម្រោងពង្រីកផលិតកម្មចំនួន២១ ជាមួយនឹងទុនវិនិយោគសរុបចំនួន ៤.៩ពាន់លានដុល្លារអាមេរិក ដែល អាចបង្កើតការងារបានជាង ៣០ម៉ឺនកន្លែង។

ក្នុងឱកាសអញ្ជើញសម្ពោធកសិដ្ឋានចិញ្ចឹមគោយកទឹកដោះគិរីសួគ៌ ស្ថិតភូមិឱភាសាំង ឃុំកណ្តឹង ស្រុកបាទី ខេត្តតាកែវ នាព្រឹកថ្ងៃទី១១ ខែមេសា ឆ្នាំ២០២៤ សម្តេចធិបតីបានថ្លែងថា ការចុះបញ្ជីគម្រោងវិនិយោគ នៅក្រុមប្រឹក្សាអភិវឌ្ឍន៍ របស់កម្ពុជា ខុសពីប្រទេសផ្សេង។ នៅប្រទេសផ្សេង ឧទាហរណ៍ចុះបញ្ជីគម្រោងវិនិយោគ ១០០គេអនុម័ត ដោយមួយចំនួនធ្វើ ឬមួយចំនួនទៀតមិនធ្វើ ប៉ុន្តែនៅកម្ពុជាមុនអនុម័ត ភាគច្រើនមានលក្ខខណ្ឌតម្រូវ គឺត្រូវមានទីតាំងច្បាស់លាស់ មានកុងត្រាជួលច្បាស់លាស់ ដែលបង្ហាញពីឆន្ទះពិតប្រាកដថា ពិតជាបោះទុនវិនិយោគ។

សម្តេចបញ្ជាក់ថា «អ្នកខ្លះថា នាយករដ្ឋមន្ត្រីថ្មី ដើរតែទាក់ម៉ូយ ទាក់ខ្យល់ ឥឡូវខ្ញុំប្រាប់ហើយ ក្នុងមួយត្រីមាសដំបូងឆ្នាំនេះ មាន១០៦គម្រោង ដែលបានដាក់ចិត្តចុះបញ្ជី ហើយធ្វើកិច្ចការងារបំពេញលក្ខខណ្ឌជាច្រើននៅកម្ពុជា»។

សម្តេចធិបតីបន្ថែមថា សម្តេចនឹងបន្តទាក់ទាញអ្នកវិនិយោគ ឱ្យមកកម្ពុជាបន្ថែមទៀត ហើយប៉ុន្មានថ្ងៃមុននេះ មានក្រុមអ្នកវិនិយោគមកពីម៉ាកាវ ហុងកុង អឺរ៉ុប កូរ៉េ បានមកស្វែងរកឱកាសវិនិយោគនៅកម្ពុជា។ សម្តេចថា នៅខែឧសភាខាងមុខនេះ សម្តេចនឹងចេញទៅប្រទេសកូរ៉េ ដើម្បីចរចាបន្ថែមទៀត លើការទាក់ទាញវិនិយោគមកកម្ពុជា។
សម្តេចបន្តថា ការទាក់ទាញអ្នកវិនិយោគ ឱ្យមកវិនិយោគនៅកម្ពុជា មិនមែនជារឿងងាយស្រួលទេ រាប់ចាប់តាំងពីការបង្កើតបរិយាកាសអំណោយផល ការលើកទឹកចិត្តផ្សេងៗ ការថែរក្សាសុខសន្តិភាព និងសណ្តាប់ធ្នាប់សង្គមជាដើម។

សម្តេចថ្លែងថា សម្ដេចបានត្រឹមតែទាក់ម៉ូយមកទេ តែមកមិនមក គេសប្បាយចិត្ត គេជោគជ័យមិនជោគជ័យអាស្រ័យ លើក្រសួងស្ថាប័នដែលដឹកនាំសម្របសម្រួលលើកទឹកចិត្តផ្ទាល់លើគោលនយោបាយ ជាមួយអាជ្ញាធរដែនដី ខិតខំសម្រួលឱ្យគេធ្វើបាន ហើយមាននិរន្តរភាព ៕