នាយករដ្ឋមន្ត្រី ហ៊ុន ម៉ាណែត៖ រាជរដ្ឋាភិបាលកម្ពុជា នឹងខិតខំប្រឹងប្រែងធ្វើឲ្យសេដ្ឋកិច្ចល្អប្រសើរឡើងវិញ ឱ្យបានឆាប់រហ័សជាទីបំផុត
ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា រាជរដ្ឋាភិបាលកម្ពុជានឹងប្រឹងប្រែងធ្វើឱ្យសេដ្ឋកិច្ចល្អប្រសើរឡើងវិញ ដូចមុនពេលកូវីដ១៩ រាតត្បាត ឱ្យឆាប់រហ័សជាទីបំផុត ដែលចំណុចនេះគឺជាគោលបំណងរបស់រាជរដ្ឋាភិបាលអាណត្តិទី៧ ដែលដឹកនាំបន្តវេនពីរាជរដ្ឋាភិបាលអាណត្តិទី៦ ក្រោមការដឹកនាំរបស់គណបក្សប្រជាជនកម្ពុជា។
ក្នុងពិធីសម្ពោធកសិដ្ឋានចិញ្ចឹមគោយកទឹកដោះគិរីសួគ៌ ស្ថិតភូមិឱភាសាំង ឃុំកណ្តឹង ស្រុកបាទី ខេត្តតាកែវ នាថ្ងៃទី១១ ខែមេសា ឆ្នាំ២០២៤ សម្តេចធិបតី ហ៊ុន ម៉ាណែត បានមានប្រសាសន៍ថា ចាប់តាំងពីឆ្នាំ២០១៩ ពិភពលោកចាប់ផ្តើមមានជំងឺរាតត្បាតបូកជាមួយអតិផរណាសេដ្ឋកិច្ច បន្ទាប់មកសង្គ្រាមផ្ទុះផ្ទួនៗទៀត ប៉ុន្តែ សេដ្ឋកិច្ចរបស់កម្ពុជា មកដល់ម៉ោងនេះបើទោះមានការថយចុះបន្តិចជំនាន់កូវីដ១៩ ប៉ុន្តែ សេដ្ឋកិច្ចក៏បានកើនឆ្នាំទៅ ៥,៦ភាគរយ ឆ្នាំ២០២៤រំពឹង ៦,៦ភាគរយ តាមរយៈការធានានូវលំនឹង ហើយស្ថានភាពសេដ្ឋកិច្ចកើនឡើង បើទោះបីចំណូលប្រជាពលរដ្ឋអាចប៉ះពាល់ ដោយសារបញ្ហាអតិផរណា ប៉ុន្តែនៅពេលជាមួយគ្នាសេដ្ឋកិច្ចរបស់កម្ពុជា នៅមានការរស់រវើក តាមរយៈការបន្តបណ្តាក់ទុនវិនិយោគថ្មីៗដែលនេះមានជាក្តីសង្ឃឹមនៃកំណើនសេដ្ឋកិច្ចរបស់កម្ពុជា។
សម្តេចធិបតី ហ៊ុន ម៉ាណែត បញ្ជាក់ថា «ហើយបងប្អូនប្រជាពលរដ្ឋនៅទីនេះ ខ្ញុំគិតថា យើងរស់នៅផ្ទាល់យើងទទួលផ្ទាល់រាជរដ្ឋាភិបាលក៏ដោយ ចំណូលប៉ុន្មានឆ្នាំនេះមានការប៉ះពាល់រាជរដ្ឋាភិបាលនឹងបន្តធ្វើយ៉ាងណាដើម្បីឱ្យលំនឹងសេដ្ឋកិច្ច និងកំណើនសេដ្ឋកិច្ច កាន់តែឆាប់ត្រឡប់មកវិញដើម្បីធ្វើយ៉ាងណាឱ្យការវិវត្តន៍សេដ្ឋកិច្ចយើង ជីវភាពរបស់របស់ប្រជាជនរបស់យើងកាន់តែកើនឡើងដូចមុនកូវីដ១៩ ឱ្យឆាប់រហ័សជាទីបំផុតនេះជាគោលបំណងរបស់រាជរដ្ឋាភិបាល»។
សម្តេចធិបតី ហ៊ុន ម៉ាណែត លើកឡើងថា ចំពោះការស្តារសេដ្ឋកិច្ចកម្ពុជាក្រោយវិបត្តិផ្ទួនៗនេះ គឺរាជរដ្ឋាភិបាលកម្ពុជាបានខិតខំធ្វើជាច្រើនមកហើយ ជាពិសេសរាជរដ្ឋាភិបាលក្នុងអាណត្តិទី៧ រាជរដ្ឋាភិបាលអត់បានឈប់សម្រាកនោះទេ។ រាជរដ្ឋាភិបាលអាណត្តិទី៧ អត់មានរាត្រីទឹកឃ្មុំ ដូចការលើកឡើងពីសំណាក់បុគ្គលមួយចំនួននោះទេ ៕
