ឧត្តមសេនីយ៍ទោ សោម ស៊ុន ចុះសួរសុខទុក្ខ និងជូនពរឆ្នាំថ្មីដល់ភរិយាសពឧត្តមសេនីយ៍ទោ ញូង ធី អតីតមេបញ្ជាការរងនាយសេនាធិការ នៃបញ្ជាការដ្ឋានតំបន់ប្រតិបត្តិការសឹករងកំពង់ធំ
ភ្នំពេញ៖ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ នៅថ្ងៃទី១១ ខែមេសា ឆ្នាំ២០២៤ បានដឹកនាំសហការី ទៅសំណេះសំណាលសាកសួរសុខទុក្ខ និងជូនពរក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំរោង ឆស័កពុទ្ធសករាជ២៥៦៨ ជូនលោកស្រី នុត សាវី ភរិយាសពឧត្តមសេនីយ៍ទោ ញូង ធី អតីតមេបញ្ជាការរង នាយសេនាធិការនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ស្ថិតនៅភូមិកំពង់រទេះ សង្កាត់កំពង់រទេះ ក្រុងស្ទឹងសែន ខេត្តកំពង់ធំ ។
ឧត្តមសេនីយ៍ទោ សោម ស៊ុន បានថ្លែងនូវការនឹករលឹក និងថ្លែងនូវការសោកស្ដាយចំពោះការបាត់បង់នាយទាហាន ដែលធ្លាប់មានគុណបំណាច់ចំពោះជាតិមាតុភូមិ ធ្លាប់ជាយុទ្ធមិត្តរួមអាវុធក្នុងការ ការពារទប់ស្កាត់ការវិលត្រឡប់មកវិញនៃរបបប្រល័យពូជសាសន៍ប៉ុលពត និងធ្លាប់រួមគ្នាក្នុងការបម្រើការងារក្នុងអង្គភាពទទួលបានជោគជ័យតាមផែនការ ដែលថ្នាក់លើបានប្រគល់ជូន ព្រមទាំងបានឧទ្ទឹសកុសលដល់វិញ្ញាណក្ខន្ធសពឧត្តមសេនីយ៍ទោ ញូង ធី បានទៅកាន់សុគតិភព កុំបីឃ្លៀងឃ្លាតឡើយ។
លោកស្រី នុត សាវី ភរិយាសពឧត្តមសេនីយ៍ទោ ញូង ធី បានសូមគោរពថ្លែងអំណរគុណដ៏ជ្រាលជ្រៅជាទីបំផុត ចំពោះឧត្តមសេនីយ៍ទោ សោម ស៊ុន និងថ្នាក់ដឹកនាំនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលតែងតែយកចិត្តទុកដាក់គិតគូរដោះស្រាយនូវរាល់ការលំបាកជូនក្រុមគ្រួសារគាត់ក៏ដូចជាយោធិន គ្រួសារយោធិន និងអតីតយុទ្ធជនដែលមានជីវភាពលំបាកខ្វះខាតដទៃទៀតនៅក្នុងខេត្តកំពង់ធំ។
នៅក្នុងឱកាសនេះ ឧត្តមសេនីយ៍ទោ សោម ស៊ុន បានជូនពរដល់លោកស្រី នុត សារី និងក្រុមគ្រួសារ ក្នុងឱកាសចូលឆ្នាំថ្មីនេះ សូមទទួលបាននូវសេចក្តីសុខ សេចក្តីចម្រើនសុខភាពល្អ និង ទទួលបាននូវពុទ្ធពរទាំងបួនប្រការកុំបីឃ្លៀងឃ្លាតឡើយ ព្រមទាំងបានជួយឧបត្ថម្ភជូនលោកស្រី នុត សាវី រួមមានអង្ករចំនួន៥០គីឡូក្រាម មីជាតិ; ទឹកត្រីទឹកស៊ីអ៊ីវ; ត្រីខកំប៉ុង និងថវិកាមួយចំនួនផង ៕
