ឯកឧត្ដម ស្វាយ សំអ៊ាង អភិបាលខេត្តស្ទឹងត្រែង អញ្ជើញសំណេះសំណាល និងនាំយកអំណោយគ្រឿងឧបភោគបរិភោគ ព្រមទាំងថវិកា ឧបត្ថម្ភជូនមណ្ឌលកុមារកំព្រា ក្នុងស្រុកថាឡាបរិវ៉ាត់
ភ្នំពេញ៖ ឯកឧត្ដម ស្វាយ សំអ៊ាង អភិបាលខេត្តស្ទឹងត្រែង នារសៀលថ្ងៃទី១២ ខែមេសា ឆ្នាំ២០២៤នេះ បានអញ្ជើញសំណេះសំណាល និងនាំយកអំណោយគ្រឿងឧបភោគបរិភោគ ព្រមទាំងថវិកា ឧបត្ថម្ភជូនមណ្ឌលកុមារកំព្រា ស្ថិតនៅឃុំថាឡាបរិវ៉ាត់ ស្រុកថាឡាបរិវ៉ាត់ ខេត្តស្ទឹងត្រែង ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ។
ក្នុងឱកាសអញ្ជើញសំណេះសំណាលនេះ ឯកឧត្ដម ស្វាយ សំអ៊ាង បានថ្លែងនូវការកោតសរសើរ និងវាយតម្លៃខ្ពស់ចំពោះប្រធានមណ្ឌលកុមារកំព្រា ដែលកន្លងមកនេះ បានខិតខំប្រឹងប្រែង សហការជាមួយអាជ្ញាធរ និងអ្នកពាក់ព័ន្ធ ជាពិសេសលើការរៀបចំគ្រប់គ្រង មណ្ឌលកុមារកំព្រានេះ ដើម្បីជួយចិញ្ចឹមបីបាច់ថែរក្សា កូនក្មួយ ចៅៗដែលនៅទីនេះទាំងអស់ ដែលគ្មានឳពុកម្ដាយ គ្មានអាណាព្យាបាល និងគ្មានទីពឹងជាដើម ។
ឯកឧត្ដមអភិបាលខេត្ត បន្តថា កូនក្មួយ ចៅៗដែលជាកុមារកំព្រានៅទីនេះ ជាអ្នកដែលមានស្រុកកំណើត នៅក្នុងខេត្តទាំងអស់ ហើយក៏ជាភ័ព្វសំណាង ដែលលោកប្រធានមណ្ឌល និងសហការី បានផ្ដួចផ្ដើមគំនិតបង្កើតនូវមណ្ឌលកុមារកំព្រានេះឡើង ក្នុងគោលបំណងជួយចិញ្ចឹមបីបាច់ថែរក្សាក្មួយ ចៅៗទាំងអស់ដែលកំពុងតែរស់នៅទីនេះ ដើម្បីឲ្យរស់រានមានជីវិត និងទទួលបានការរៀនសូត្រ ដូចកុមារទូទៅផងដែរ ។
ឯកឧត្ដម ស្វាយ សំអ៊ាង លើកឡើងថា ថ្វីដ្បិតតែកូនក្មួយ និងចៅៗ គ្មានឳពុកម្ដាយ ឬអាណាព្យាបាល ប៉ុន្តែកូនក្មួយក៏មានភ័ព្វសំណាង ដែលលោកប្រធានមណ្ឌល ក៏ដូចជាសហការី ទទួលយកចិញ្ចឹមបីបាច់មើលថែរក្សា ចាត់ទុកដូចជាកូន ។ ឯកឧត្ដមថា នេះហើយជាឳពុកម្ដាយទីពីរ ដែលផ្ដល់នូវក្ដីសង្ឃឹមសារជាថ្មី សម្រាប់កូនក្មួយបានរស់រានមានជីវិត និងមានឱកាសសិក្សារៀនសូត្រ ទទួលបានចំណេះដឹងដូចទៅនឹងកុមារទូទៅនៅក្នុងសង្គមកម្ពុជាដែរ ។
ឯកឧត្ដម ស្វាយ សំអ៊ាង បានថ្លែងថា មណ្ឌលកុមារកំព្រានេះ អាចដំណើរការទៅបាន ក៏អាស្រ័យដោយមានការ សហការស្ថាប័នរដ្ឋ ដែលតែងតែផ្សារភ្ជាប់គ្នា និងមានទំនាក់ទំនឹងជាមួយគ្នា ក្នុងន័យថាធ្វើយ៉ាងណាយើងរួមគ្នា ជួយដល់សង្គម ជាពិសេសជួយដោះស្រាយបញ្ហា ក្មួយៗនៅក្នុងមណ្ឌលកុមារកំព្រានេះ ។
ឯកឧត្ដមអភិបាលខេត្ត គូសបញ្ជាក់ថា ក្មួយៗក៏មានភ័ព្វសំណាងដែរ ដែលទទួលបានការយកចិត្តទុកដាក់ពីរាជរដ្ឋាភិបាល បានសហការជាមួយអង្គការសង្គមស៊ីវិល ក៏ដូចជាមណ្ឌលនានា ដើម្បីរៀបចំផែនការទទួលយកក្មួយៗមកចិញ្ចឹមបីបាច់ថែរក្សា ឲ្យទទួលបានជីវិតថ្មី និងទទួលបានការរៀនសូត្រផងដែរ ។
អំណោយដែលឯកឧត្ដម ស្វាយ សំអ៊ាង អភិបាលខេត្តស្ទឹងត្រែង ឧបត្ថម្ភជូនមណ្ឌលកុមារកំព្រា នាឱកាសនេះរួមមាន៖ ១- អង្ករនាងមិញ (ខ្មែរប្រណិត)៖ ២០០ គ.ក្រ, ២- មីម៉ាៗ (កេសធំ)
០៦ កេស ស្មើនឹង ៣៦ កេសតូច, ៣- ត្រីខកំប៉ុង (រូបសំពៅ) ០៦ កេស, ៤- ទឹកស៊ីអីវ ១០ កេស, ៥- ទឹកត្រី ៤០ យូរ, ៦- ថវិកា៖ ២.០០០.០០០រៀល (ពីរលានរៀលគត់) ៕ 
