ឯកឧត្ដម ស្វាយ សំអ៊ាង និងឯកឧត្តម ឈាង ឡាក់ អញ្ជើញជាអធិបតីក្នុងព្រឹត្តិការណ៍ «សេសានសង្ក្រាន្ត» ដើម្បីបង្កើតការសប្បាយជូនប្រជាពលរដ្ឋក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ

ភ្នំពេញ៖ នាថ្ងៃទី១២ ខែមេសា ឆ្នាំ២០២៤ ឯកឧត្ដម ស្វាយ សំអ៊ាង អភិបាលខេត្តស្ទឹងត្រែង និងលោកជំទាវ និងឯកឧត្តម ឈាង ឡាក់ ប្រធានក្រុមប្រឹក្សាខេត្ត និងលោកជំទាវ និង បានអញ្ជើញជាអធិបតីក្នុងព្រឹត្តិការណ៍ «សេសានសង្ក្រាន្ត» ដើម្បីបង្កើតការសប្បាយជូនប្រជាពលរដ្ឋក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ឆ្នាំរោង ឆស័ក ពុទ្ធសករាជ ២៥៦៨ ស្ថិតក្នុងស្រុកសេសាន ខេត្តស្ទឹងត្រែង។

សូមបញ្ជាក់ថា៖ «សេសានសង្ក្រាន្ត» បានធ្វើឡើងរយៈពេល០២ថ្ងៃគឺចាប់ពីថ្ងៃទី១១ ដល់ថ្ងៃទី១២ ខែមេសា ឆ្នាំ២០២៤ ដោយមានការចូលរួមពីសំណាក់ក្រុមការងារ ស.ស.យ.ក. កងកម្លាំងប្រដាប់អាវុធ អ្នកពាក់ព័ន្ធនិងប្រជាពលរដ្ឋមកពីគ្រប់ទិសទីយ៉ាងច្រើនកុះករ។

បើតាម លោក សុវណ្ណ ពិសេដ្ឋ អភិបាលស្រុកសេសាន បានលើកឡើងថា ព្រឹត្តិការណ៍នេះ ជាព្រឹត្តិការណ៍ដែលយើងត្រៀមសម្រាប់ពិធីអបអរសាទរពិធីបុណ្យចូលឆ្នាំថ្មី ប្រពៃណីជាតិខ្មែរ ដែលនឹងឈានចូលមកដល់នៅថ្ងៃខាងមុខដ៏ខ្លីនេះ ហើយព្រឹត្តិការណ៍សង្ក្រាន្តនេះទៀតសោតក៏មិនមែនមានន័យថាធ្វើតែក្នុងទឹកដីឃុំកំភុន ស្រុកសេសាន ខេត្តស្ទឹងត្រែង នោះទេតែថ្ងៃនេះគឺជាថ្ងៃដែល ព្រឹត្តិការណ៍សង្ក្រាន្តទូទាំងស្រុកមាន ២៦គោលដៅ ក៏នឹងរៀបចំព្រឹត្តិការណ៍សង្ក្រាន្តនេះផងដែរ។

ក្នុងឱកាសដ៏ប្រពៃថ្លៃថ្លា នៃព្រឹត្តិការណ៍សង្ក្រាន្តសេសាននោះ ឯកឧត្ដម ស្វាយ សំអ៊ាង អភិបាលខេត្ត បានមានប្រសាសន៍ថា ព្រឹត្តិការណ៍សង្ក្រាន្តដែលយើងរៀបចំនាពេលនេះគឺសំដៅក្នុងការរក្សានូវអត្តសញ្ញាណប្រពៃណីទំនៀមទម្លាប់របស់បុព្វការីជន របស់ជនជាតិខ្មែរយើងក្នុងការរក្សានូវអត្តសញ្ញាណរបស់ខ្លួនឯង ហើយក៏ចង់បង្ហាញអំពីស្នាដៃ ក៏ដូចជាសមិទ្ធផលថ្មីៗ ដែលរាជរដ្ឋាភិបាលក្រោមការដឹកនាំដ៏ថ្លៃថ្លារបស់សម្ដេចមហាបវរធិបតី ហ៊ុន ម៉ាណែត ជាពិសេសគឺក្នុងការអនុវត្តនូវគោលនយោបាយយុទ្ធសាស្ត្របញ្ចកោណ ដំណាក់កាលទី១ សម្រាប់រាជរដ្ឋាភិបាលកម្ពុជា ហើយសង្ក្រាន្តនាពេលនេះក៏យើងខ្ញុំធ្វើឡើងក្នុងគោលបំណងបង្ហាញពីសាមគ្គីភាព ឯកភាពគ្នាជាធ្លុងមួយ។

ឯកឧត្តម ស្វាយ សំអ៊ាង បានបន្តថា ការរៀបចំព្រឹត្តិការណ៍ «សេសានសង្ក្រាន្ត» នេះបានបង្ហាញពីការយកចិត្តទុកដាក់របស់អាជ្ញាធរ ស្រុកសេសាន ក្នុងការបង្កលក្ខណៈកម្សាន្តសប្បាយរីករាយជូនដល់បងប្អូនប្រជាពលរដ្ឋក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរនេះ និងចង់បង្ហាញអំពីវប្បធម៌ប្រពៃណីទំនៀមទម្លាប់របស់ខ្មែរយើងដែលមានតាំងពីយូរលង់ណាស់មកហើយដែលវប្បធម៌ប្រពៃណីនេះត្រូវបានលុប ទៅវិញក្នុងរបបប្រល័យពូជសាសន៍ប៉ុលពត។

ឯកឧត្ដម ស្វាយ សំអ៊ាង ក៏បានរំលឹកពាក្យថា «សង្ក្រាន្ត» គឺជាពាក្យរបស់ខ្មែរយើងដែលមានតាំងពីបរមបុរាណមកឲ្យតែមានពិធីបុណ្យចូលឆ្នាំគឺគេធ្វើសង្ក្រាន្តដែលការធ្វើសង្ក្រាន្តនេះក៏ដើម្បីអបអរសាទរទទួលទេវតាឆ្នាំថ្មីរបស់យើងដែលនឹងយាងគង់វង្សស្ថិតនៅជាម្លប់សេចក្ដីចម្រើនដល់ប្រជាពលរដ្ឋយើង។ ការរៀបចំសង្ក្រាន្តនេះជាការពូនជ្រំឡើងវិញនូវតម្លៃវប្បធម៌របស់យើងហើយប្រសិនបើគ្មានការរៀបចំរំលឹកឡើងវិញវាអាចធ្វើឲ្យបាត់បង់នូវវប្បធម៌ប្រពៃណីជាតិយើង។

ឯកឧត្ដមអភិបាលខេត្ត ក៏បានសង្កត់ធ្ងន់ថា រាល់អ្វីដែលកើតឡើងនាពេលនេះដូចជា ការរៀបចំសង្ក្រាន្ត និងការដាក់តាំងផលិតផលសហគមន៍ឲ្យភ្ញៀវអន្តរជាតិបានឃើញគឺកើតឡើងពីតម្លៃនៃសន្តិភាព ប្រសិនបើប្រទេសជាតិយើងគ្មានសុខសន្តិភាពអ្វីទាំងនោះគឺមិនអាចរៀបចំបានឡើយដូចនេះយើងទាំងអស់គ្នាត្រូវរួបរួមគ្នាការពារនូវសន្តិភាពឲ្យស្ថិតស្ថេរគង់វង្សបន្តទៅមុខទោះស្ថិតនៅក្នុងតម្លៃណាក៏ដោយ។

ជាទីបញ្ចប់ ឯកឧត្តម ស្វាយ សំអ៊ាង អភិបាលខេត្ត ក៏បានជូនពរបងប្អូនប្រជាពលរដ្ឋក្នុងស្រុកសេសាន ក៏ដូចជាក្នុងខេត្តស្ទឹងត្រែងទាំងមូល ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ សូមជួបប្រទះតែនឹងព្រះពុទ្ធពរទាំងឡាយ៤ប្រការគឺ៖ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ ៕