សម្តេចធិបតី ហ៊ុន ម៉ាណែត ឯកភាពជាមួយសំណើសកលវិទ្យាល័យការពារជាតិ សុំបង្កើនប្រាក់កម្រៃម៉ោងបង្រៀន និងម៉ោងស្រាវជ្រាវដល់យោធាចារ្យ

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានឯកភាពចំពោះសំណើរបស់សកលវិទ្យាល័យការពារជាតិ សុំបង្កើនប្រាក់កម្រៃម៉ោងបង្រៀន និងម៉ោងស្រាវជ្រាវដល់យោធាចារ្យ ។

ការឯកភាពរបស់សម្ដេចធិបតី ធ្វើឡើងបន្ទាប់ពីសកលវិទ្យាល័យការពារជាតិ គោរពស្នើសុំសម្តេច បង្កើនប្រាក់កម្រៃម៉ោងបង្រៀន និងប្រាក់កម្រៃស្រាវជ្រាវរបស់យោធាចារ្យ ឲ្យបានទៀងទាត់និងតាមគោលការណ៍ ។ ការស្នើនេះដែរធ្វើឡើង ក្នុងពិធីសម្ពោធអគារសហសិក្សា អគារស្នាក់នៅ អគារអាហារដ្ឋាន និងបិទវគ្គបណ្ដុះបណ្ដាល និងហ្វឹកហ្វឺនឆ្នាំ២០២៣ បន្តបើកវគ្គសិក្សាឆ្នាំ២០២៤ នាថ្ងៃទី១៩ មេសា ក្រោមអធិបតីភាពដ៏ខ្ពង់ខ្ពស់របស់សម្ដេចធិបតី ហ៊ុន ម៉ាណែត ។។

ជុំវិញសំណើនេះដែរសម្តេចធិបតី បានណែនាំឲ្យក្រសួងការពារជាតិ ក្រសួងសេដ្ឋកិច្ចហិរញ្ញវត្ថុ ដើម្បីពិនិត្យលើកិច្ចការងារនេះ និងបានឱ្យពិនិត្យមើលថា តើ​អាចមានគោលការណ៍អ្វីបន្ថែម សម្រាប់យោធាចារ្យផងដែរ ។

សម្តេចធិបតី ហ៊ុន ម៉ាណែត ថ្លែងបញ្ជាក់ថា «នៅជើងគោកខ្ញុំបានសាកល្បង អនុវត្តកម្មវិធីបន្ថែមមួយចំនួន ហើយគិតគូររឿងនឹង ព្រោះវិនិយោគទៅលើគ្រូសំខាន់ណាស់ វិនិយោគទៅលើគ្រូ មិនប្រគល់តែភារកិច្ច ប្រគល់តែការទទួលខុសត្រួវ​នោះទេ តែត្រូវគិតគូអំពីជីវភាពរស់នៅ ជាពិសេសម៉ោងបង្រៀននេះ ទី១អ្វីដែលមានគឺថាដោះឲ្យចេញ ពិនិត្យមើលលទ្ធភាពអ្វីបន្ថែមផ្ទាល់ សម្រាប់អ្នកដែលបង្រៀនពិតប្រាកដតែម្តង ។ ចឹងសូមឲ្យក្រសួងការពារជាតិ សូមឲ្យពិនិត្យមើលហើយរៀបចំ ទៅលើកិច្ចការងារនេះ ​ឲ្យបានដោយប្រសិទ្ធភាពតែម្តង ហើយម៉ោងស្រាវជ្រាវអ្វីក៏ត្រូវគិត» ៕