ក្រសួងផែនការ បើកវគ្គបណ្ដុះបណ្តាលមន្ត្រីប្រចាំតំបន់ មន្ត្រីជំនួយការតំបន់ និងមន្ត្រីត្រួតពិនិត្យ សម្រាប់អង្កេតចន្លោះជំរឿនប្រជាជននៅកម្ពុជាឆ្នាំ២០២៤

ភ្នំពេញ៖ នៅទីស្តីការក្រសួងផែនការ នាព្រឹកថ្ងៃទី១៩ ខែមេសា ឆ្នាំ២០២៤ ក្រសួងផែនការបានប្រារព្ធពិធីបើកវគ្គបណ្ដុះបណ្តាលមន្ត្រីប្រចាំតំបន់ មន្ត្រីជំនួយការតំបន់ និងមន្ត្រីត្រួតពិនិត្យ សម្រាប់អង្កេតចន្លោះជំរឿនប្រជាជននៅព្រះរាជាណាចក្រកម្ពុជា ឆ្នាំ២០២៤ ក្រោមអធិបតីភាពដ៏ខ្ពង់ខ្ពស់របស់ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ។

គួររំលឹងថា អង្កេតចន្លោះជំរឿនប្រជាជននៅព្រះរាជាណាចក្រកម្ពុជា ត្រូវបានរៀបចំឡើងរៀងរាល់៥ឆ្នាំម្តងបន្ទាប់ពីជំរឿន ដើម្បីប្រមូលព័ត៌មាននិងធ្វើបច្ចុប្បន្នភាពអំពីរបាយប្រជាជន រចនាសម្ព័ន្ធអាយុ ចរិតលក្ខណៈ តម្រូវការ និងឌីណាមិក របស់ប្រជាជនកម្ពុជា ដែលរួមចំណែកយ៉ាងធំធេង ក្នុងការអភិវឌ្ឍសង្គម-សេដ្ឋកិច្ច ដោយបានបង្កើតឡើងនូវទិន្នន័យ ព័ត៌មានប្រជាសាស្ត្រដ៏សម្បូរបែបនិងមិនអាចខ្វះបាន ដែលរាជរដ្ឋាភិបាល ដៃគូអភិវឌ្ឍន៍ និងអ្នកពាក់ព័ន្ធ បានយកទៅប្រើប្រាស់ក្នុងការរៀបចំតាក់តែងនិងអនុវត្តគោលនយោបាយ យុទ្ធសាស្រ្ត និងផែនការអភិវឌ្ឍន៍ជាតិ និងតាមវិស័យ ក៏ដូចជាក្នុងការតាមដានត្រួតពិនិត្យនិងវាយតម្លៃលើលទ្ធផលនានាដែលសម្រេចបាន ប្រកបដោយប្រសិទ្ធភាព។

វគ្គបណ្តុះបណ្តាលនាឱកាសនេះ ត្រូវបានរៀបចំឡើងដើម្បីតម្រង់ទិសនិងពង្រឹងសមត្ថភាពដល់មន្ត្រីប្រចាំតំបន់ និងមន្ត្រីជំនួយការតំបន់ សម្រាប់ការអង្កេតចន្លោះជំរឿនប្រជាជន ដែលនឹងក្លាយទៅជាគ្រូបង្គោលសម្រាប់បណ្តុះបណ្តាលបន្តដល់មន្ត្រីសម្ភាសន៍ស្រង់ទិន្នន័យ និងជាមន្ត្រីទទួលបន្ទុកខាងកិច្ចការងារបច្ចេកទេសនៅតាមបណ្តារាជធានី ខេត្ត។ រីឯមន្ត្រីត្រួតពិនិត្យវិញ ក៏នឹងក្លាយជាមន្ត្រីត្រួតពិនិត្យផ្ទាល់នៅតាមមូលដ្ឋានជាក់ស្តែងផងដែរ។

មានប្រសាសន៍ក្នុងពិធី ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីជំនាញ នៃវិទ្យាស្ថានជាតិស្ថិតិ ដែលបានសម្របសម្រួលរៀបចំវគ្គបណ្តុះបណ្តាលនេះឡើង សំដៅធ្វើយ៉ាងណាឱ្យអង្កេតនេះទទួលបានលទ្ធផលល្អប្រសើរ ជឿទុកចិត្តបាន និងទាន់ពេលវេលា។

ឯកឧត្តមរដ្ឋមន្ត្រី បានស្នើឱ្យសិក្ខាកាមទាំងអស់ ត្រូវយកចិត្តទុកដាក់ខ្ពស់លើមេរៀន និងបទបង្ហាញរបស់គ្រូឧទ្ទេស ព្រមទាំងចូលរួមពិភាក្សាឱ្យបានផុសផុលលើកម្រងសំណួរអង្កេត មានវត្តមានទៀងទាត់ និងរក្សាវិន័យឱ្យបានល្អ ដើម្បីស្រូបយករាល់ចំណេះដឹង និងបទពិសោធន៍ល្អៗ សំដៅសម្រេចបាននូវទិសដៅរួម ក្នុងការធ្វើអង្កេតចន្លោះជំរឿនប្រជាជននៅព្រះរាជាណាចក្រកម្ពុជា ឆ្នាំ២០២៤ ប្រកបដោយជោគជ័យ៕