គណ:កម្មការចម្រុះរៀបចំការបោះឆ្នោត បើកកិច្ចប្រជុំពិនិត្យវឌ្ឍនភាពនៃដំណេីរការរៀបចំការបោះឆ្នោតជ្រើសរើសប្រធានសមាគមសិល្បករខ្មែរ ដែលនឹងប្រព្រឹត្តទៅនៅថ្ងៃទី២ ខែឧសភា ខាងមុខនេះ

ភ្នំពេញ៖ នៅរសៀលថ្ងៃទី១៨ ខែមេសា ឆ្នាំ២០២៤ នាទីស្ដីការក្រសួងវប្បធម៌ និងវិចិត្រសិល្បៈ គណ:កម្មការចម្រុះរៀបចំការបោះឆ្នោត បានបើកកិច្ចប្រជុំពិនិត្យវឌ្ឍនភាពនៃដំណេីរការរៀបចំការបោះឆ្នោតជ្រើសរើសប្រធានសមាគមសិល្បករខ្មែរ ដែលនឹងប្រព្រឹត្តទៅនៅថ្ងៃទី២ ខែឧសភា ឆ្នាំ២០២៤ ខាងមុខនេះ។

កិច្ចប្រជុំពិភាក្សានេះ ធ្វើឡើងក្រោមអធិបតីភាពឯកឧត្តម ទិត ថាវរិទ្ធ រដ្ឋលេខាធិការ ក្រសួងវប្បធម៌ និងវិចិត្រសិល្បៈ និងមានវត្តមានអញ្ជេីញចូលរួមរបស់ឯកឧត្តម គឹម ពីនន់ អនុរដ្ឋលេខាធិការក្រសួងវប្បធម៌ និងវិចិត្រសិល្បៈ និងមានសមាសភាពពីអង្គភាពពាក់ព័ន្ធរួមទាំងសិល្បករឯករាជ្យមួយចំនួនទៀតចូលរួមផងដែរ។

អង្គប្រជុំបានពិភាក្សាផ្ដោតសំខាន់លើរបៀបវារៈមួយចំនួន ដេីម្បីធានាដល់ដំណើរការបោះឆ្នោតប្រព្រឹត្តិទៅដោយរលូន មានតម្លាភាព និងយុត្តិធម៌ ជាពិសេសគឺអាចជ្រើសរើសបានថ្នាក់ដឹកនាំសមាគម ដែលមានសមត្ថភាពពិតប្រាកដបន្តដឹកនាំសមាគមកាន់តែរីកចម្រើន សំដៅការពារប្រយោជន៍បង្អូនសិល្បករទូទៅ។

តាងនាមគណៈកម្មការរៀបចំការបោះឆ្នោតជ្រើសរើសប្រធានសមាគមសិល្បករខ្មែរ អាណត្តិថ្មី សមាគម សិល្បករខ្មែរ សូមជម្រាបជូនដំណឹងដល់ សិល្បករ សិល្បការិនី ទាំងអស់ ដែលមានបំណងចូលរួមក្នុងការបោះ ឆ្នោតជ្រើសរើសប្រធានសមាគមសិល្បករខ្មែរ អាណត្តិទី៦ (ឆ្នាំ២០២៤-២០២៩) អាចមកបំពេញឈ្មោះដោយ ផ្ទាល់ដើម្បីទទួល បណ្ណបញ្ជាក់សិទ្ធិចូលរួមបោះឆ្នោត ចាប់ពីថ្ងៃទី២០ ដល់ថ្ងៃទី៣០ ខែមេសា ឆ្នាំ២០២៤ រៀង រាល់ថ្ងៃធ្វើការ ពីថ្ងៃចន្ទ ដល់ថ្ងៃសុក្រ វេលាម៉ោង ៨:៣០នាទីព្រឹក ដល់ម៉ោង ១៧:០០នាទីរសៀល នៅទីស្នាក់ការបណ្តោះអាសន្ន ផ្ទះលេខ០២ មហាវិថីម៉ៅ សេទុង សង្កាត់ទន្លេបាសាក់ ខណ្ឌចំការមន រាជធានីភ្នំពេញ (ក្រោយក្រសួងកសិកម្ម)។

ព័ត៌មានបន្ថែមសូមទំនាក់ទំនង លោក គង់ សុធារិទ្ធ លេខាធិការដ្ឋាននៃគណៈកម្មការរៀបចំ ការបោះ ឆ្នោតជ្រើសរើសប្រធានសមាគមសិល្បករខ្មែរ អាណត្តិថ្មី៖ ទូរស័ព្ទ និងតេឡេក្រាម៖ ០១៦ ២២២ ៩២០, ហ្វេសប៊ុក៖ Kong Sothearith និង អ៊ីមែល៖ rith_popstar@yahoo.com ៕