សម្តេចធិបតី ស្នើឱ្យឡាវ រិះរកវិធីធានានៃការផ្គត់ផ្គង់អគ្គិសនីមកកម្ពុជា ប្រកបដោយនិរន្តរភាព

ភ្នំពេញ៖ ក្នុងជំនួបជាមួយឯកឧត្តមបណ្ឌិត ថងលុន ស៊ីសុលីត ប្រធានរដ្ឋ នៃសាធារណរដ្ឋប្រជាធិបតេយ្យប្រជាមានិតឡាវ នៅរសៀលថ្ងៃទី២៣ ខែមេសា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានស្នើឱ្យឡាវពិចារណា និងរិះរកដំណោះស្រាយសមស្របនានា ធ្វើយ៉ាងណាធានាបាននូវការផ្គត់ផ្គង់អគ្គិសនីមកកម្ពុជាប្រកបដោយនិរន្តរភាពនិងទាន់ពេលវេលា។

សម្តេចធិបតី ហ៊ុន ម៉ាណែត បានគូសបញ្ជាក់បញ្ជាក់ថា វិស័យថាមពល មានសារៈសំខាន់សម្រាប់ប្រទេសកម្ពុជា ជាពិសេសដើម្បីធានាឱ្យបាននូវសន្តិសុខថាមពល និងធានាបាននូវភាពប្រកួតប្រជែងរបស់កម្ពុជានៅក្នុងតំបន់ និងពិភពលោក។

ក្នុងឱកាសនោះ ឯកឧត្តមប្រធានរដ្ឋ បានកោតសរសើរការផ្លាស់ប្តូរនាយករដ្ឋមន្ត្រីនៅកម្ពុជា ដែលជាការផ្លាស់ប្តូរអ្នកបន្តវេនដោយរក្សាបានស្ថេរភាព និងកិច្ចអភិវឌ្ឍន៍។

ឯកឧត្តមប្រធានរដ្ឋ ក៏បានកត់សម្គាល់ឃើញថា ក្នុងរយៈពេលនៃការដឹកនាំរបស់សម្ដេចធិបតី ហ៊ុន ម៉ាណែត ប្រមាណ៨ខែមកនេះ កម្ពុជាមានស្ថិរភាពនយោបាយ និងកំពុងបោះជំហានទៅមុខ ទាំងទិដ្ឋភាពសន្តិសុខ សន្តិភាព កំណើនសេដ្ឋកិច្ច និងទាំងការកែលម្អជីវភាពរស់នៅរបស់ប្រជាពលរដ្ឋ ៕