ស្នើឲ្យគ្រប់សិល្បករ សិល្បការិនី ផ្តោតអារម្មណ៍ខ្លាំងទៅលើទ្រឹស្តី ចង្កឹះមួយបាច់ ដើម្បីពង្រឹងសាមគ្គីភាព និងភាពរឹងមាំ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានស្នើឱ្យសិល្បករ សិល្បការិនីទាំងអស់ ត្រូវផ្តោតអារម្មណ៍ខ្លាំងទៅលើទ្រឹស្តីចង្កឹះមួយបាច់ គេកាច់មិនបាក់ ដើម្បីពង្រឹងសាមគ្គីភាព និងភាពរឹងមាំ ព្រមទាំងពង្រឹងគោលដៅរួម និងជោគជ័យរួម ។
ក្នុងឱកាសអញ្ជើញពិសាអាហារសាមគ្គី និងបំពាក់គ្រឿងឥស្សរិយយសជូនលោកគ្រូ អ្នកគ្រូ សិល្បករ សិល្បការិនី នាថ្ងៃទី២៥ ខែមេសា ឆ្នាំ២០២៤នេះ សម្តេចធិបតី ហ៊ុន ម៉ាណែត ក៏បានថ្លែងលើកទឹកចិត្ត ដល់សិល្បករ សិល្បការិនី គ្រប់ទម្រង់ ចូលរួមចងក្រងជាសមាគម ចូលរួមជាមួយសមាជិក សមាគមសិល្បៈគ្រប់ទម្រង់ ដើម្បីប្រសិទ្ធិភាព នៃការធ្វើការរួមគ្នា ក្នុងភាពជាបងប្អូន ដោយចេះជួយគ្នាទៅវិញទៅមក ស្របតាមប្រពៃណី ទំនៀមទម្លាប់ដូនតាយើង ៕
