អាមេរិកបញ្ចប់កញ្ចប់ថវិកាយោធាអ៊ុយក្រែនតម្លៃ៦ពាន់លានដុល្លារ
បរទេស៖មន្ទីរបញ្ចកោណកំពុងរៀបចំប្រកាសកញ្ចប់សព្វាវុធ និងគ្រាប់រំសេវសម្រាប់ទីក្រុងគៀវ ដែលមានតម្លៃរហូតដល់ ៦ពាន់លានដុល្លារ នៅដើមថ្ងៃសុក្រនេះ នេះបើតាមមន្ត្រីអនាមិកបានប្រាប់ Politico ។
ប្រភពបាននិយាយថា ក្នុងចំណោមរបស់របរដែលមាននៅក្នុងកញ្ចប់នោះ មានគ្រាប់រំសេវសម្រាប់ប្រព័ន្ធការពារដែនអាកាស Patriot និង NASAMS កាំភ្លើងធំ និងគ្រាប់រ៉ុក្កែត HIMARS កាំជ្រួចពីអាកាសទៅអាកាស យន្តហោះគ្មានមនុស្សបើក និងអាវុធប្រឆាំងដ្រូន។
ទីក្រុងវ៉ាស៊ីនតោនបានប្រញាប់ប្រញាល់យកគ្រាប់រំសេវដែលមានតម្លៃ ១ ពាន់លានដុល្លារដែលដកចេញពីស្តុកយោធាអាមេរិកភ្លាមៗ នៅពេលដែលប្រធានាធិបតី Joe Biden បានចុះហត្ថលេខាលើច្បាប់ផ្តល់ជំនួយចំនួន ៦១ ពាន់លានដុល្លារដល់រដ្ឋាភិបាលអ៊ុយក្រែន។
កញ្ចប់ថវិកាចំនួន ៦ ពាន់លានដុល្លារដែលមិនទាន់សម្រេច នឹងមិនចេញពីឃ្លាំងស្តុករបស់មន្ទីរបញ្ចកោណនោះទេ ដោយសារវាត្រូវបានផ្តល់មូលនិធិតាមរយៈគំនិតផ្តួចផ្តើមជំនួយសន្តិសុខអ៊ុយក្រែន (USAI)។ កម្មវិធីនេះមានកិច្ចសន្យាចេញមន្ទីរបញ្ចកោណដល់ឧស្សាហកម្មយោធាអាមេរិកក្នុងការសាងសង់ឧបករណ៍ថ្មីសម្រាប់ក្រុងគៀវ។ Politico បានកត់សម្គាល់ថា ទំនិញ “ទំនងជានឹងមិនមកដល់ប្រទេសអ៊ុយក្រែនក្នុងរយៈពេលជាច្រើនឆ្នាំ”។
