សម្ដេចធិបតី បង្កើតកម្លាំងអន្ដរាគមន៍ពិសេស ដើម្បីអនុវត្តតាមបទបញ្ជារបស់សម្ដេច និងដោះស្រាយបញ្ចប់រាល់បញ្ហា ដែលនៅរាំងស្ទះដោះស្រាយមិនចេញ
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានឲ្យដឹងថា សម្ដេចបានបង្កើត «កម្លាំងអន្ដរាគមន៍ពិសេស» មួយដើម្បីអនុវត្តតាមបទបញ្ជាដោយត្រង់របស់សម្ដេច និងដោះស្រាយបញ្ចប់រាល់បញ្ហាទាំងឡាយ ដែលនៅរាំងស្ទះដោះស្រាយមិនចេញ។
ក្នុងពិធីសំណេះសំណាលជាមួយមន្ត្រីរាជការ បុគ្គលិក កម្មករ និយោជិតបម្រើការងារនៅកំពង់ផែស្វយ័តក្រុងព្រះសីហនុ នៅថ្ងៃទី១ ខែឧសភា ឆ្នាំ២០២៤នេះ សម្ដេចធិបតី ហ៊ុន ម៉ាណែត បានអះអាងថា «កម្លាំងអន្ដរាគមន៍ពិសេស» នេះ ត្រូវបានបង្កើតឡើងបន្ថែមលើយន្ដការដែលមានស្រាប់ គឺកិច្ចការតាមដាន ត្រួតពិនិត្យ និងដោះស្រាយបញ្ហា ចំណុះខុទ្ទកាល័យនាយករដ្ឋមន្ដ្រី។
សម្ដេចធិបតី ហ៊ុន ម៉ាណែត បញ្ជាក់ថា «ខ្ញុំបង្កើតយន្ដការមួយគេហៅ កម្លាំងអន្ដរាគមន៍ពិសេស បើគម្រោងណា ផែនការណា បទបញ្ជាណាដែលដាក់ទៅ នៅមិនទាន់ដាច់ស្រេច ឬមួយនៅស្ទះ ហើយសម្របសម្រួលស្ថាប័នហើយនៅខ្វះ គឺនៅបញ្ជូនក្រុមការងារអន្ដរាគមន៍របស់នាយករដ្ឋមន្ដ្រី ចុះទៅជួយសម្របសម្រួលឲ្យដាច់តែម្ដង»។
សម្ដេចធិបតីបន្ថែមថា យន្ដការ ឬកម្លាំងអន្ដរាគមន៍ពិសេសនេះ មិនមែនដោះស្រាយជំនួសបណ្ដាក្រសួង ស្ថាប័ននោះទេ ពោលគ្រាន់តែជួយទម្លុះរាល់បញ្ហាណាដែលជាប់គាំងដោះស្រាយមិនចេញតែប៉ុណ្ណោះ ៕
