ឯកឧត្ដម ស្វាយ សំអ៊ាង សង្ខេបពីសមិទ្ធផលនៃការអនុវត្តតម្រោង បែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចដំណាក់កាលទី៣ ក្នុងខេត្តស្ទឹងត្រែង
ភ្នំពេញ៖ ក្នុងពិធីចាប់ឆ្នោតយកដីឡូត៍លំនៅឋាន និងដីឡូត៍កសិកម្ម នៃកម្មវិធីសម្បទានដីសង្គមកិច្ចគម្រោង បែងចែកដីរដើម្បីសង្គមកិច្ច និងការអភិវឌ្ឍរសេដ្ឋកិច្ច ដំណាក់កាលទី៣ (LASED III) នាថ្ងៃទី៧ ខែឧសភា ឆ្នាំ២០២៤នេះ ឯកឧត្ដម ស្វាយ សំអ៊ាង អភិបាលខេត្តស្ទឹងត្រែង រាយការណ៍ដោយសង្ខេបស្តីពីសមិទ្ធផលនៃការអនុវត្តតម្រោង បែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចដំណាក់កាលទី៣ (LASED III) ក្នុងខេត្តស្ទឹងត្រែង ដែលមានដូចខាងក្រោម៖
-រាជរដ្ឋាភិបាលកម្ពុជា បានសម្រេចផ្តល់ដីទំហំ ៣ ១៦៤ ហិកតា ៨០អា ១០សង់ទីអា ចេញពីដីរបៀង ជីវៈចម្រុះប្រព័ន្ធតំបន់ការពារធម្មជាតិ ធ្វើអនុបយោគពីដីសាធារណៈរបស់រដ្ឋមកជាដីឯកជនរបស់រដ្ឋសម្រាប់ អនុវត្តកម្មវិធីសម្បទានដីសង្គមកិច្ចជូនគ្រួសារក្រីក្រស៊ីវិលទូទៅ ដែលខ្វះដីស្ថិតក្នុងភូមិសាស្ត្រចំណុចអូរសែវ ឃុំភ្លុក ឃុំស្រែគរ និងឃុំសាមមួយ ស្រុកសេសាន ខេត្តស្ទឹងត្រែង តាមរយៈអនុក្រឹត្យលេខ ១៤៧ អនក្រ.បក ចុះថ្ងៃទី១៩ ខែសីហា ឆ្នាំ២០២១។
-ថ្ងៃទី២១ ខែមិថុនា ឆ្នាំ២០២២ ក្រុមការងារបច្ចេកទេសនៃមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត បានចុះវាស់វែង និងចេញប័ណ្ណកម្មសិទ្ធិដីរដ្ឋក្នុងទីតាំងដីសម្បទានសង្គមកិច្ចរបស់គម្រោង LASED III នេះ ចំនួន ៩បណ្ណ លើផ្ទៃដីទំហំ ៣ ១៦៤ ហិកតា ៨០អា ១០សង់ទីអា។
– ថ្ងៃទី០១ ខែកញ្ញា ឆ្នាំ២០២៣ គណៈកម្មការ បានប្រជុំអនុម័តផែនការប្រើប្រាស់ដីដោយបានបែងចែក ជាដីឡូត៍លំនៅឋាន ដីឡូត៍កសិកម្ម តំបន់រដ្ឋបាល និងហេដ្ឋារចនាសម្ព័ន្ធរូបវន្តរួមមាន៖ សាលារៀន មណ្ឌល សុខភាព កីឡដ្ឋាន ផ្សារ សួនច្បារ… ក្នុងនោះបានបែងចែកដីឡូត៍លំនៅឋានចំនួន ៦៩២ឡូត៍ (១ឡូត៍មានទំហំ ៤០ម៉ែត្រ x ៦០ម៉ែត្រ) ស្មើនឹង ១៦៦, ០៨ហិកតា និងដីឡូត៍កសិកម្មចំនួន ៦៧៦ឡូត៍ ទំហំ ៣ហិកតា ក្នុង១ឡូត៍ ស្មើនឹង ២ ០២៨ហិកតា។
– ចំពោះហេដ្ឋារចនាសម្ព័ន្ធផ្លូវ គណៈកម្មការបានកំណត់ផ្លូវមេទំហំ ៣០ម៉ែត្រ តភ្ជាប់ពីផ្លូវមេបេតុងឃុំ ស្រែគរ ចូលទៅតំបន់ដីឡូត៍លំនៅឋាន មានប្រវែងសរុប ២ ៤២៨, ៩២ម៉ែត្រ កំណត់ផ្លូវមេទំហំ ៣០ម៉ែត្រ ជុំវិញ តំបន់ក្រវ៉ាត់ព្រំដីសម្បទានសង្គមកិច្ច មានប្រវែងសរុប ១២ ២២៤,៣២ម៉ែត្រ និងបានកំណត់ផ្លូវរងទំហំ ២៤ ម៉ែត្រ ក្នុងដីឡូត៍តំបន់លំនៅឋាន និងដីឡូត៍កសិកម្ម មានប្រវែងសរុប ៨៤ ២០១, ៣២ម៉ែត្រ។
-បានបញ្ចប់នីតិវិធីនៃការជ្រើសរើសមុខសញ្ញាអ្នកទទួលដី ផ្អែកតាមលំដាប់ពិន្ទុពីខ្ពស់មកទាប និងការ ត្រួតពិនិត្យផ្ទៀងផ្ទាត់បញ្ចប់ចុងក្រោយ ទទួលបានចំនួន ៦៣៤គ្រួសារ (ក្នុងចំណោម ៩៣៤គ្រួសារ ដែលបាន ដាក់ពាក្យស្នើសុំ) ជាមុខសញ្ញាអ្នកទទួលដីអាទិភាព ដែលត្រូវទទួលបានដីសម្បទានសង្គមកិច្ចនៃគម្រោង LASED III ក្នុងនោះ ឃុំសាមមួយមានចំនួន ២២៦គ្រួសារ ឃុំភ្លុក មានចំនួន ២២៧គ្រួសារ និងឃុំស្រែតរមាន ចំនួន ១៨១គ្រួសារ ត្រូវបានជ្រើសរើសជាគ្រួសារអាទិភាពសម្រាប់ចាប់យកដីឡូត៍លំនៅឋាន និងដីឡូត៍ កសិកម្ម នៃកម្មវិធីសម្បទានដីសង្គមកិច្ច គម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ច ដំណាក់ កាលទី៣ (LASED III) ដែលបាន និងកំពុងប្រព្រឹត្តទៅនាពេលនេះ។
ក្នុងឱកាសនោះដែរ ឯកឧត្ដមស្វាយ សំអ៊ាង បានគោរពថ្លែងអំណរគុណជាអនេកប្បការចំពោះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ថ្នាក់ដឹកនាំក្រសួងរៀបចំដែនដី នគរូបនីយកម្ម និង សំណង់ ក្រសួងកសិកម្ម រុក្ខាប្រមាញ់ និងនេសាទ ក្រសួងសេដ្ឋកិច្ច និងហិរញ្ញវត្ថុ ធនាគារពិភពលោក (World Bank) ដែលបានកំណត់ជ្រើសរើសយកខេត្តស្ទឹងត្រែង ជាខេត្តគោលដៅនៃការអនុវត្តគម្រោង LASED III និងសូមកោតសរសើរ និងថ្លែងអំណរគុណចំពោះនាយកគម្រោង មន្ត្រីតម្រោងថ្នាក់ជាតិ ថ្នាក់ខេត្ត រដ្ឋបាល ស្រុកសេសាន មន្ទីរ អង្គភាពជំនាញ និងអាជ្ញាធរឃុំពាក់ព័ន្ធទាំងអស់ដែលបានលះបង់ពេលវេលា កម្លាំងកាយ កម្លាំងចិត្ត ប្រកបដោយស្មារតី និងឆន្ទៈមុះមុតក្នុងការចូលរួមអនុវត្តគម្រោង សំដៅលើកកម្ពស់ជីវភាព និង សុខមាលភាពរស់នៅរបស់បងប្អូនប្រជាពលរដ្ឋយើងឱ្យកាន់តែប្រសើរឡើងជាលំដាប់ ៕
