APF ពិនិត្យ និងពិភាក្សាលើរបាយការណ៍ស្ដីពី ស្ថានភាពនយោបាយនៅបណ្ដាប្រទេសនិយាយភាសាបារាំង
ភ្នំពេញ៖ គណៈប្រតិភូក្រុមសភាជាតិកម្ពុជានៃសភានិយាយភាសាបារាំង (APF) រួមមាន ឯកឧត្ដម ខៀវ កាញារីទ្ធ តំណាងរាស្ត្រមណ្ឌលខេត្តកំពង់ចាម ប្រធានគណៈប្រតិភូ និងលោកជំទាវ កុល ធារិន តំណាងរាស្ត្រមណ្ឌលខេត្តកំពង់ចាម និងជាសមាជិកាគណៈកម្មការទី២ នៃរដ្ឋសភា បានចូលរួមកិច្ចប្រជុំគណៈកម្មការនយោបាយ APF នៅប្រទេសលុចសំបួ ចាប់ពីថ្ងៃទី២៥ ខែមេសា ដល់ថ្ងៃទី០២ ខែឧសភា ឆ្នាំ២០២៤។
ក្នុងអំឡុងពេលនោះដែរ គណៈប្រតិភូរដ្ឋសភាបានចូលរួមកិច្ចប្រជុំពិភាក្សាកែសម្រួលលក្ខន្តិកៈ និងកិច្ចប្រជុំគណៈកម្មការនយោបាយ ក្រោមអធិបតីភាព ឯកឧត្ដម Christophe-André Frassa ប្រធានក្រុមការងារកែសម្រួលលក្ខន្តិកៈ និងជាប្រធានគណៈកម្មការនយោបាយដែលមានអ្នកចូលរួមកិច្ចប្រជុំមានប្រមាណ ៥០នាក់ ដោយក្នុងនោះមាន សមាជិក សមាជិការដ្ឋសភា-ព្រឹទ្ធសភា និងមន្ត្រី មកពីក្រុមសភាជាតិចំនួន១៩ មកពីអាហ្វ្រិក អាមេរិក អាស៊ី និងអឺរ៉ុប ព្រមទាំងទីប្រឹក្សាពិសេសរបស់អគ្គលេខាធិការអង្គការអន្តរជាតិហ្វ្រង់កូហ្វូនី(OIF) ផងដែរ។
ជាលទ្ធផលកិច្ចប្រជុំបានពិនិត្យ និងពិភាក្សាលើរបាយការណ៍ស្ដីពីស្ថានភាពនយោបាយនៃបណ្ដាប្រទេសនិយាយភាសាបារាំង ជាអាទិ៍ បច្ចុប្បន្នភាពទាក់ទងនឹងស្ថានភាពនៃការលុបបំបាត់ទោសប្រហារជីវិត ស្ថានភាពនយោបាយនៃក្រុមសភាជាតិនិយាយភាសាបារាំងនីមួយៗ ការប្រយុទ្ធប្រឆាំងនឹងព័ត៌មានមិនពិត តួនាទីនៃពហុភាគីនិយមក្នុងការលើកកម្ពស់លទ្ធិប្រជាធិបតេយ្យ សន្តិភាពយូរអង្វែង សន្តិសុខតាមប្រព័ន្ធអ៉ីនធឺណិត ព្រមទាំងបានដាក់ចេញនូវយន្តការឃ្លាំមើលលទ្ធិប្រជាធិបតេយ្យផងដែរ ៕
