សម្តេចធិបតី៖ រាជរដ្ឋាភិបាល យកចិត្ដទុកដាក់លើកកម្ពស់ វិស័យឯកជន ដើម្បីចូលរួមអភិវឌ្ឍន៍សេដ្ឋកិច្ចជាតិ ឈានទៅសម្រេចបាននូវចុក្ខវិស័យ ឆ្នាំ២០៥០
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា រាជរដ្ឋាភិបាល យកចិត្តទុកដាក់ ក្នុងការលើកកម្ពស់ តួនាទីសិទ្ធិរបស់វិស័យឯកជន ដើម្បីចូលរួម អភិវឌ្ឍន៍សេដ្ឋកិច្ចជាតិ ឈានទៅដល់កម្ពុជាអាចសម្រេចបាននូវចុក្ខវិស័យ ឆ្នាំ២០៥០ ធ្វើយ៉ាងណាឲ្យប្រទេសជាតិ ប្រែក្លាយទៅជាប្រទេស ដែលមានចំណូលខ្ពស់ ។
ក្នុងឱកាសអញ្ជើញប្រកាសបើកឲ្យដំណើរការជាផ្លូវការ សមាគមសហព័ន្ធអ្នកវិនិយោគកម្ពុជា និងពិសាអាហារសាមគ្គី នាថ្ងៃទី៩ ខែឧសភា ឆ្នាំ២០២៤ សម្តេចធិបតី ហ៊ុន ម៉ាណែត បានមានប្រសាសន៍ថា វិស័យឯកជន ក៏ដូចជារាជរដ្ឋាភិបាល មានកាតព្វកិច្ច និងការចូលរួម ដើម្បីឲ្យភាពជាដៃគូនេះជោគជ័យ ក្នុងន័យនេះ កាតព្វកិច្ចរបស់រាជរដ្ឋាភិបាល មានការងារស្នូលជាច្រើន ដែលបានធ្វើ ក្នុងរយៈពេល៤៥ឆ្នាំកន្លងមកនេះ ជាពិសេសក្រោយបញ្ចប់សង្គ្រាម នៅឆ្នាំ១៩៩៨។
សម្តេចធិបតី បន្ថែមថា រាជរដ្ឋាភិបាល អាណត្ដិមុនៗ ដឹកនាំដោយសម្ដេចតេជោ ហ៊ុន សែន បានធានានូវស្ថេរភាព ធានានូវសន្ដិភាព ធានានូវសក្ដានុពល នៃការអភិវឌ្ឍន៍សេដ្ឋកិច្ច ដូច្នេះដើម្បីឲ្យប្រទេសកម្ពុជា ឈានឆ្ពោះទៅចាប់គោលដៅ នៅឆ្នាំ២០៥០ ដែលកាតព្វកិច្ច និងភារកិច្ចរបស់រដ្ឋាភិបាល រួមមាន៖ -ត្រូវធានារក្សាសន្ដិសុខស្ថេរភាពសង្គម, រក្សាស្ថេរភាពម៉ាក្រូសេដ្ឋកិច្ច, -គាំទ្រដល់សេដ្ឋកិច្ចទីផ្សារ តាមរយៈនូវការធានាក្របខណ្ឌច្បាប់បទដ្ឋានគតិយុត្ដ ដែលមានប្រសិទ្ធភាពច្បាស់លាស់តម្លាភាព, -ដាក់ចេញនូវក្របខណ្ឌគោលនយោបាយ និងការលើកទឹកចិត្ដផ្សេងៗ ដល់វិស័យឯកជន, -វិនិយោគិនទៅលើធនធានមនុស្ស ទាំងសុខភាព ទាំងចំណេះដឹង និងវិនិយោគលើហេដ្ឋរចនាសម្ព័ន្ធរូបវន្ដសំខាន់ៗ ផ្លូវ, ទឹក, ភ្លើង និងបច្ចេកវិទ្យា។
សម្តេចធិបតី សង្កត់ធ្ងន់ថា រាជរដ្ឋាភិបាលដឹកនាំដោយសម្តេច មិនមែនមានតែទ្រឹស្តីនោះទេ តែផ្តល់តម្លៃលើលទ្ធផលជាក់ស្តែង លទ្ធផលលើដី។ សម្តេចថា គោលដៅរបស់រាជរដ្ឋាភិបាលនីតិកាលថ្មី តាំងពីថ្ងៃដំបូង គឺការរក្សាសុខសន្តិភាព ស្ថេរភាព ហើយរយៈពេល៨ខែមកនេះ ទទួលបានលទ្ធផល៕
