មន្ត្រីជាន់ខ្ពស់ក្រសួងសុខាភិបាល ចុះអភិបាលការងារគាំទ្រមន្ទីរពេទ្យខេត្តចំនួនបី ក្នុងគោលបំណងធ្វើឱ្យកាន់តែប្រសើរឡើងនូវការផ្តល់សេវាប្រកបដោយគុណភាព
ភ្នំពេញ៖ ចាប់ពីថ្ងៃទី៧ ដល់ថ្ងៃទី១០ ខែឧសភា ឆ្នាំ២០២៤ ឯកឧត្តម ង៉ូវ កាង រដ្ឋលេខាធិការក្រសួងសុខាភិបាលអបដំណើរដោយឯកឧត្តមឈុំ វណ្ណារិទ្ធ អនុរដ្ឋលេខាធិការ បានចុះអភិបាលការងារគាំទ្រនូវមន្ទីរពេទ្យខេត្តចំនួនបីមានខេត្ត ប៉ៃលិន ខេត្តបាត់ដំបង និងខេត្តបន្ទាយមានជ័យក្នុងគោលបំណងធ្វើឱ្យកាន់តែប្រសើរឡើងនូវការផ្តល់សេវាប្រកបដោយគុណភាព។
ឯកឧត្តមរដ្ឋលេខាធិការបានពិនិត្យគ្រប់ផ្នែកនូវសកម្មភាពផ្តល់សេវាដោយបានធ្វើការប្រាស្រ័យទាក់ទងពិភាក្សាជាមួយថ្នាក់ដឹកនាំមន្ទីរពេទ្យ លោកគ្រូ អ្នកគ្រូពេទ្យ ព្រមទាំងអ្នកជំងឺ និងក្រុមគ្រួសារប្រកបដោយភាពស្និតស្នាលហើយបានផ្តល់យោបល់ដោះស្រាយបញ្ហាមួយចំនួនដែលលោកគ្រូ អ្នកគ្រូ អ្នកជំងឺ និងក្រុមគ្រួសារបានលើកឡើង។ ហើយបានលើកយោបល់កែលម្អនូវចំណុចជាច្រើនដូចជា ហេដ្ឋារចនាសម្ព័ន្ធ បរិដ្ឋានអនាម័យ របៀបរបបលំហូរអ្នកជំងឺ ការទទួលអ្នកជំងឺដោយភាពរួសរាយរាក់ទាក់ប្រកបដោយវិជ្ជាជីវៈ ការទុកដាក់ឯកសារអ្នកជំងឺដោយសុវត្ថិភាព ការបង្កើតប្រព័ន្ធទូរសព្ទទាំងសេវារដ្ឋ និងឯកជនក្នុងករណីបញ្ជូន ការពង្រីកនូវសមត្ថភាពជំនាញដើម្បីឆ្លើយតបទៅនឹងការរីកចម្រើនរបស់មន្ទីរពេទ្យ។
ក្នុងកិច្ចប្រជុំបូកសរុបរួមជាមួយមន្រ្តី ឯកឧត្តមរដ្ឋលេខាធិការបានលើកឡើងអំពីការខិតខំយកចិត្តទុកដាក់ពីសំណាក់ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាលចំពោះសុខទុក្ខបងប្អូន និងប្រជាពលរដ្ឋធ្វើយ៉ាងណាបានការផ្តល់សេវាជូនប្រជាជនដោយគុណភាពខ្ពស់ប្រកបដោយក្រមសីលធម៌។ កិច្ចប្រជុំនេះក៏មានការចូលរួមពីឯកឧត្តមប្រធានមន្ទីរសុខាភិបាលតាមខេត្តនីមួយៗផងដែរ៕
