ឧបនាយករដ្ឋមន្ត្រី សាយ សំអាល់ ជំរុញរួមគ្នាទប់ស្កាត់លើការបំភាន់ព័ត៌មាន នៃកិច្ចអភិវឌ្ឍន៍ តំបន់រុនតាឯក និងពាក់ស្នែង
ភ្នំពេញ៖ ឯកឧត្តម សាយ សំអាល់ ឧនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូប នីយកម្ម និងសំណង់ ជំរុញឱ្យរួមគ្នាទប់ស្កាត់លើការបំភាន់បំភ្លៃព័ត៌មានមិនពិតនានា ដើម្បីជាបច្ច័យល្អ សម្រាប់ជំរុញដល់កិច្ចអភិវឌ្ឍន៍តំបន់រុនតាឯក និងពាក់ស្នែង ក្នុង ខេត្តសៀមរាប ស្របតាមទិសដៅរបស់រាជរដ្ឋាភិបាលកម្ពុជា។
ក្នុងកិច្ចប្រជុំពិនិត្យវឌ្ឍនភាពតំបន់អភិវឌ្ឍន៍រុនតាឯក និងពាក់ស្នែង ក្នុងខេត្តសៀមរាប នាព្រឹក ថ្ងៃទី១១ ខែឧសភា ឆ្នាំ២០២៤ ដោយមានការចូលរួមពីអន្តរក្រសួង និងស្ថាប័នពាក់ព័ន្ធ ឯកឧត្តមឧបនាយករដ្ឋមន្ត្រី មានប្រសាសន៍ថា កិច្ចប្រជុំនាពេលនេះធ្វើឡើងក្នុងគោលបំណង ដើម្បីឱ្យមានការឯកភាពគ្នា រួមគ្នាគិត រួមគ្នាទទួលខុសត្រូវ និងរកដំណោះស្រាយលើបញ្ហានានា ដែលកើតមានឡើងក្នុងតំបន់អភិវឌ្ឍន៍រុនតាឯក និងពាក់ស្នែងក្នុងខេត្តសៀមរាប ក្នុងនោះមាន ការភាន់ច្រឡំ ផ្នែក បច្ចេកទេសលើការបើកប្រាក់ឧបត្ថម្ភប្រចាំខែមានការយឺតយ៉ាវ សម្រាប់ប្រជាពលរដ្ឋ ក្នុងតំបន់អភិវឌ្ឍន៍រុនតាឯក និងពាក់ស្នែង ការភាន់ច្រឡំលើការហាមឃាត់ការចាក់ដីបំពេញបន្ថែម និងបញ្ហានានាមួយចំនួនទៀត។ ក្នុងន័យនេះ យើងទាំងអស់គ្នាត្រូវទប់ស្កាត់លើការ បំភាន់បំភ្លៃព័ត៌មានមិនពិត ដោយចេតនាក្តី ឬអចេតនាក្តី ដើម្បីជាបច្ច័យល្អ សម្រាប់ជំរុញដល់កិច្ច អភិវឌ្ឍន៍តំបន់រុនតាឯក និងពាក់ស្នែងស្របតាមទិសដៅរបស់រាជរដ្ឋាភិបាលកម្ពុជា។
ឯកឧត្តមឧបនាយករដ្ឋមន្ត្រី សាយ សំអាល់ បានស្នើសុំឱ្យអង្គប្រជុំពិភាក្សាគ្នាកំណត់ឱ្យច្បាស់លាស់ចំពោះទិសដៅការងារ និងការរៀបចំក្រុងប្រកបដោយហេដ្ឋារចនាសម្ព័ន្ធគ្រប់បែបយ៉ាង ស្របតាមគោលនយោបាយ យុទ្ធសាស្ត្ររបស់រាជរដ្ឋាភិបាល ដើម្បីឱ្យប្រជាពលរដ្ឋ ដែលត្រូវបានផ្លាស់ប្ដូរទីលំនៅមករស់នៅទីតាំងថ្មីក្នុងតំបន់អភិវឌ្ឍន៍រុនតាឯក និងពាក់ស្នែងនេះ ងាយស្រួលរស់នៅ និងបង្កើនជីវភាពគ្រួសារឱ្យប្រសើរឡើង។
ឯកឧត្តមឧបនាយករដ្ឋមន្ត្រី បានបន្ថែមថា ជាមួយនេះអាជ្ញាធរមូលដ្ឋានភូមិឃុំត្រូវ រៀបចំផែនទីបែងចែកព្រំប្រទល់កំណត់តំបន់នីមួយៗឱ្យបានច្បាស់លាស់ រីឯគណៈកម្មាធិការដីសម្បទានសង្គមកិច្ច ត្រូវសម្រួចមុខងារតួនាទីភារកិច្ចរបស់ខ្លួនបន្ថែមទៀត ហើយក្រុមការងារត្រូវគិតគូរទាំងបច្ចេកទេស នយោបាយ និងថវិកា ដើម្បីជំរុញពន្លឿនការងារចុះបញ្ជីដីធ្លី ឱ្យបានចប់សព្វគ្រប់ នាពេលឆាប់ៗខាងមុខនេះ សំដៅបញ្ចប់វិវាទនានាផងដែរ។
គួរបញ្ជាក់ផងដែរថា ក្រសួងរៀបចំដែនដី នគរូបនីយកម្ម និងសំណង់ បានដាក់ចេញនូវយុទ្ធសាស្ត្រ សំខាន់ៗមួយចំនួន ដើម្បីសម្រេចនូវគោលដៅក្នុងការចុះបញ្ជីដីបង្ហើយ តាមផែនការដែលបានកំណត់ក្នុង នីតិកាលទី៧នេះ សំដៅបង្កើតបរិយាកាស មិនមានវិវាទដីធ្លី នៅក្នុងប្រទេសកម្ពុជា និងពង្រឹងសុវត្ថិភាពនៃការកាន់កាប់ដីធ្លីស្របច្បាប់ ព្រមទាំងជំរុញការប្រើប្រាស់ដីឱ្យអស់សក្តានុពល ដើម្បីបង្កើនជីវភាពរស់នៅរបស់ប្រជាពលរដ្ឋ និងអភិវឌ្ឍសេដ្ឋកិច្ចឱ្យកាន់តែប្រសើរឡើង ៕
