រដ្ឋមន្ត្រីក្រសួងផែនការ បន្តដឹកនាំកិច្ចប្រជុំលេខាធិការដ្ឋាន នៃគណៈកម្មការអន្តរក្រសួងសម្រាប់រៀបចំផែនការយុទ្ធសាស្ត្រអភិវឌ្ឍន៍ជាតិ

ភ្នំពេញ៖ នាព្រឹកថ្ងៃទី១៣ ខែឧសភា ឆ្នាំ២០២៤ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ និងជាប្រធាននៃគណៈកម្មការអន្តរក្រសួងសម្រាប់រៀបចំផែនការយុទ្ធសាស្ត្រអភិវឌ្ឍន៍ជាតិ ២០២៤-២០២៨ (គ.អ.ផ.យ.អ.ជ.) បានអញ្ជើញជាអធិបតីភាពដ៏ខ្ពង់ខ្ពស់ បន្តដឹកនាំកិច្ចប្រជុំលេខាធិការដ្ឋាននៃ គ.អ.ផ.យ.អ.ជ. នាទីស្តីការក្រសួងផែនការ។ កិច្ចប្រជុំនេះ រៀបចំឡើងដើម្បីបន្តពិនិត្យ និងរៀបចំសេចក្តីព្រាងផែនការយុទ្ធសាស្ត្រអភិវឌ្ឍន៍ជាតិ ២០២៤-២០២៨ (ផ.យ.អ.ជ.) ដែលជាឧបករណ៍គោលនយោបាយជាតិគោលតែមួយសម្រាប់ការអនុវត្ត យុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល និងផ្តល់ការតម្រង់ទិសដល់ការរៀបចំនិងការអនុវត្តផែនការអភិវឌ្ឍន៍តាមវិស័យ។ សមាសភាពចូលរួម រួមមានសមាជិក សមាជិកា លេខាធិការដ្ឋាននៃ (គ.អ.ផ.យ.អ.ជ.) និងលោកសាស្ត្រាចារ្យបណ្ឌិត ភឹម ស៊ីណារិទ្ធ ទីប្រឹក្សារបស់អង្គការ UNDP ប្រចាំកម្ពុជា។ គួររំលឹកថា បន្ទាប់ពីការបោះឆ្នោតសកលនៅឆ្នាំ១៩៩៣ រាជរដ្ឋាភិបាលកម្ពុជាបានរៀបចំឡើងនូវ កម្មវិធីជាតិសម្រាប់នីតិសម្បទានិងអភិវឌ្ឍន៍កម្ពុជា និង ផែនការអភិវឌ្ឍន៍សេដ្ឋកិច្ច-សង្គមកិច្ច ៥ឆ្នាំ លើកទី១ របស់ខ្លួន សម្រាប់កំណត់ចក្ខុវិស័យនៃការកសាងនិងអភិវឌ្ឍន៍ប្រទេសជាតិឡើងវិញ។ យ៉ាងណាមិញមកដល់ឆ្នាំ១៩៩៨ ទើបគេសង្កេតឃើញការផ្លាស់ប្តូរដ៏គួរឱ្យកត់សម្គាល់ក្នុងប្រវត្តិសាស្ត្ររបស់កម្ពុជា ដែលក្នុងនោះមិនត្រឹមតែក្នុងទិដ្ឋភាពសង្គម-សេដ្ឋកិច្ចប៉ុណ្ណោះទេ ប៉ុន្តែលើទិដ្ឋភាពនយោបាយផងដែរ។ តាមរយៈនយោបាយ ឈ្នះ-ឈ្នះ ដ៏ប៉ិនប្រសប់របស់ សម្តេចតេជោប្រធានព្រឹទ្ធសភា និងជាអតីតនាយករដ្ឋមន្ត្រីនៃព្រះរាជាណាចក្រកម្ពុជា បាននាំមកនូវសុខសន្តិភាពពេញលេញ ដោយបានបិទបញ្ចប់ទាំងស្រុងនូវសង្គ្រាមស៊ីវិលរ៉ាំរ៉ៃរាប់ទសវត្សរ៍របស់កម្ពុជា ហើយជវភាពនៃការកសាងជាតិឡើងវិញក៏បានលេចរូបរាងតាមរយៈការដាក់ចេញនូវ “យុទ្ធសាស្ត្រត្រីកោណ” របស់រាជរដ្ឋាភិបាល។ បន្ទាប់មក ផែនការអភិវឌ្ឍន៍សេដ្ឋកិច្ច-សង្គមកិច្ច ៥ឆ្នាំ លើកទី២ ក៏ត្រូវបានរៀបចំឡើង ដើម្បីផ្តល់ការតម្រង់ទិសដល់ការបន្តខិតខំប្រឹងប្រែងក្នុងការអភិវឌ្ឍសេដ្ឋកិច្ចនិងសង្គម ព្រមទាំងការអនុវត្តដោយជោគជ័យនូវ “យុទ្ធសាស្ត្រត្រីកោណ” របស់រាជរដ្ឋាភិបាលកម្ពុជា។ ដោយផ្អែកលើមុំទាំង៣, យុទ្ធសាស្ត្រត្រីកោណ បានកំណត់នូវបុរេលក្ខខណ្ឌដ៏សំខាន់បំផុត ក្នុងការប្រែក្លាយកម្ពុជាពីប្រទេសមួយដែលធ្លាប់មានអស្ថិរភាព សង្គ្រាម ជម្លោះផ្ទៃក្នុង និងភាពអន់ថយ ឱ្យក្លាយទៅជាចំណុចកណ្តាលនៃ សន្តិភាពដ៏រឹងមាំ សន្តិសុខ និងសណ្តាប់ធ្នាប់សង្គម ការគោរពលទ្ធិប្រជាធិបតេយ្យ ការគោរពសិទ្ធិនិងសេចក្តីថ្លៃថ្នូររបស់មនុស្ស កិច្ចសហប្រតិបត្តិការនិងកិច្ចអភិវឌ្ឍ ដោយមានការចូលរួមពីគ្រប់មជ្ឈដ្ឋានពាក់ព័ន្ធ។ មកដល់នីតិកាលទី៣ “យុទ្ធសាស្ត្រត្រីកោណ” បានវិវដ្តទៅជា “យុទ្ធសាស្ត្រចតុកោណ” ដែលជាការបន្តពង្រឹង និងស្ថាបនាលើមូលដ្ឋាននៃសមិទ្ធផលនានា ដោយផ្តោតលើការកែលម្អ និងបង្កើនសមត្ថភាពរបស់ស្ថាប័នសាធារណៈ លើកស្ទួយអភិបាលកិច្ចនិងធ្វើទំនើបកម្មរចនាសម្ព័ន្ធសេដ្ឋកិច្ចជាតិ ក្នុងទិសដៅលើកកម្ពស់កំណើនសេដ្ឋកិច្ច បង្កើតការងារជូនប្រជាពលរដ្ឋ ធានាសមធម៌ក្នុងសង្គម និងបង្កើនប្រសិទ្ធភាពនៃវិស័យសាធារណៈ ព្រមទាំងការការពារសម្បត្តិធម្មជាតិនិងសម្បត្តិវប្បធម៌ជាតិ ដែលទាំងនេះសុទ្ធតែជាកត្តាគន្លឹះសម្រាប់ការអភិវឌ្ឍប្រកបដោយចីរភាព និងការកាត់បន្ថយភាពក្រីក្ររបស់ប្រជាជន សំដៅសម្រេចបាននូវ “គោលដៅអភិវឌ្ឍន៍សហស្សវត្សរ៍”, ទាញយកផលចំណេញខ្ពស់ពី “ការធ្វើសមាហរណកម្មសេដ្ឋកិច្ចអាស៊ាន ២០១៥” ព្រមទាំងសម្រេចបាននូវ “ក្របខណ្ឌគោលដៅអភិវឌ្ឍន៍ប្រកបដោយចីរភាពកម្ពុជា ២០១៦-២០៣០”។ ទន្ទឹមនឹងការដាក់ចេញនូវ​ “យុទ្ធសាស្ត្រចតុកោណ” ទាំង៤ដំណាក់កាល ផែនការយុទ្ធសាស្ត្រអភិវឌ្ឍន៍ជាតិ (ផ.យ.អ.ជ.) ដែលជាឯកសារគោលនយោបាយសំខាន់ទី២ របស់រាជរដ្ឋាភិបាលកម្ពុជា ក៏ត្រូវបានរៀបចំឡើងតាមដំណាក់កាល ដើម្បីជាផែនទីចង្អុលផ្លូវសម្រាប់អនុវត្តកម្មវិធីគោលនយោបាយរបស់រាជរដ្ឋាភិបាល ក៏ដូចជា យុទ្ធសាស្ត្រចតុកោណ របស់រាជរដ្ឋាភិបាល។ ក្នុងរយៈពេល ២៥ឆ្នាំ នៃយុទ្ធសាស្ត្រត្រីកោណ និងយុទ្ធសាស្ត្រចតុកោណទាំង៤ដំណាក់កាល ប្រទេសកម្ពុជាបានឆ្លងកាត់នូវបរិវត្តកម្មដ៏ធំធេងនិងសម្រេចបានសមិទ្ធផលជាច្រើនគួរជាទីមោទនៈ ដែលរួមចំណែកដល់ការអភិវឌ្ឍសង្គម-សេដ្ឋកិច្ចកម្ពុជា ស្របតាមការរំពឹងទុក ហើយនៅក្នុងនីតិកាលទី៧ នេះ ក្រោមការដឹកនាំប្រកបដោយគតិបណ្ឌិតដ៏ខ្ពង់ខ្ពស់បំផុតរបស់សម្តេចមហាបវរធិបតីនាយករដ្ឋមន្ត្រី កម្ពុជាបាននិងវិវដ្តនៅក្នុងវដ្តថ្មីមួយទៀត ពោលគឺ យុទ្ធសាស្ត្របញ្ចកោណ ដើម្បីឈានទៅសម្រេចបាននូវ “ចក្ខុវិស័យកម្ពុជា ឆ្នាំ២០៥០”។ កិច្ចប្រជុំនាព្រឹកនេះ ដើម្បីបន្តពិនិត្យ និងរៀបចំសេចក្តីព្រាងផែនការយុទ្ធសាស្ត្រអភិវឌ្ឍន៍ជាតិ ២០២៤-២០២៨ (ផ.យ.អ.ជ.) ដែលជាឯកសារគោលនយោបាយសំខាន់ទី២ និងជាឧបករណ៍គោលនយោបាយជាតិគោលតែមួយសម្រាប់ការអនុវត្ត យុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល ៕